QR Eńbek jáne halyqty áleýmettik qorǵaý ministri Birjan Nurymbetov balamen úide otyrýǵa májbúr jumysshylarǵa demalys berý tártibin túsindirdi, dep habarlaidy "Ult aqparat".
«Prezident jumys berýshilerge balamen úide otyrýǵa májbúr ata-analarǵa aqyly demalys berýdi tapsyrǵan edi. Bul jumys qalai iske asady? Eńbek kodeksi boiynsha, elimizdegi kez kelgen jumys istep júrgen azamat jylyna bir ret aqyly eńbek demalysyna shyǵa alady. Ol úshin ár mekemede keste jasalady, sol kestege sáikes demalys beriledi. Bul jaǵdaida jumys berýshilerge jyl saiynǵy eńbek demalysyn balamen otyrýǵa májbúr bolǵan ata-analarǵa osy kúnderi berýdi suraimyz» - dedi ministr Ortalyq kommýnikatsiialar qyzmetinde ótken brifingte.
Bul rette jumysshyǵa keminde ortasha jalaqy tólenetin bolady.
«Óz kezeginde jumys berýshi jumysshydan úidegi ózge otbasy músheleriniń demalysqa shyqpaǵany týraly ia bolmasa januiada jumyssyz adamnyń joq ekendigi týraly anyqtama talap etýge quqyly», - dedi B. Nurymbetov.
Aita keteiik, 13 naýryzda Prezident jedel áreket etý shtabynyń otyrysynda balasymen úide otyrýǵa májbúr ata-analardy aqyly eńbek demalysyna jiberýdi tapsyrǵan edi.
Buǵan deiin ministr qashyqtyqtan jumys isteý múmkindigi bar barlyq kásiporyndar men mekemeler osy rejimge aýysýǵa mindetti ekenin málimdedi.
Sondai-aq, kásipkerler ózderiniń buiryǵymen qysqartylǵan jumys rejimine kóshýge quqyly.
Eske sala ketsek, QR Prezidentiniń Jarlyǵymen Dúniejúzilik densaýlyq saqtaý uiymynyń jańa COVID-19 koronavirýsyn pandemiia dep jariialaýyna bailanysty QR barlyq aýmaǵynda 2020 jylǵy 16 naýryz 08 saǵat 00 minýt pen 2020 jylǵy 15 sáýir 07 saǵat 00 minýt aralyǵynda tótenshe jaǵdai engizildi.
Sondai-aq Qazaqstan azamattaryna 15 sáýirge deiin el aýmaǵynan shyǵýǵa tyiym salyndy.
QR Prezidenti Qasym-Jomart Toqaev el halqyna úndeý joldady. Joldaýdyń tolyq mátini arnaiy jariialandy.
