Álem turǵyndarynyń 99 paiyzy lastanǵan aýamen tynys alýda. Aýanyń lastaný deńgeii Dúniejúzilik densaýlyq saqtaý uiymy (DDU) belgilegen normalardan asyp túsedi jáne adam densaýlyǵyna úlken qaýip tóndirip tur. Bul týraly QazAqparat BUU jańalyqtar ortalyǵyna silteme jasap habarlaidy.
Qazirgi kezde 117 eldiń 6 myńnan astam qalasynda aýa sapasyna monitoring jasalýda.
Lastanǵan aýanyń quramynda usaq qatty bólshekter men azot dioksidi joǵary, bul jaǵdai, ásirese, tabysy tómen jáne ortasha elderde jii kezdesedi. DDU qazbaly otyndy paidalanýdy shekteýge jáne aýanyń lastanýyn azaitý úshin basqa da sharalar qoldanýǵa úndep otyr.
Bul derekter biyl «Bizdiń planeta — bizdiń densaýlyǵymyz» uranymen ótetin Dúniejúzilik densaýlyq kúni qarsańynda shyǵarylǵan DDU aýa sapasy týraly 2022 jylǵy jańartylǵan aqparat qorynan alynǵan. Derekter bazasy álemdegi aýanyń jai-kúiin baqylaý maqsatynda quryldy jáne Turaqty damý maqsattaryna qol jetkizýdegi ilgerileýdi baqylaý úshin paidalanylady.
Aýa quramyndaǵy lastaýshy zattardyń tómen deńgeii de densaýlyqqa aitarlyqtai ziian keltiredi. Qatty bólshekter ókpege tereń enip, qan ainalymy júiesine sińip, júrek-qantamyr jáne tynys alý júielerine áser etedi. Aýadaǵy azot dioksidiniń mólsheri tynys alý organdary aýrýlaryn, atap aitqanda demikpe týdyrady.
El úkimetteriniń aýanyń sapasyn jaqsartý úshin jasai alatyn qadamdarǵa: DDU talaptaryna sáikes keletin ulttyq standarttar engizý, aýa sapasyna monitoring júrgizý, tek ekologiialyq taza turmystyq energiiaǵa kóshý, shyǵaryndylar salasy men kólik quraldarynyń effektivtiligine qatań standarttar qoiý, sondai-aq energotiimdi turǵyn úi men elektr energiiasyn óndirýge investitsiia salý jatady.
