Dúniejúzilik densaýlyq saqtaý uiymynyń (DDU) direktory Tedros Adan Gebreiesýs delta nusqasynan da qaýipti shtamynyń paida bolý qaýpi týraly eskertti, dep habarlaidy TASS.
Bul týraly ol sársenbide Tokioda Halyqaralyq Olimpiada komitetiniń (HOK) 138-sessiiasynda sóilegen sózinde aitty.
«Virýs keńinen taralǵan saiyn onyń delta nusqasyna qaraǵanda qaýiptirek nusqasy paida bolýy múmkin. Mundai nusqalary kóbeigen saiyn, olardyń bireýi bolmasa bireýine vaktsinamyz qarsy tura almai qalýy yqtimal. Sonyń saldarynan biz áý bastaǵy jaǵdaiymyzǵa túsip, qaita basynan bastaýǵa týra keledi», – dedi ol.
DDU direktory odan «Pandemiia qashan aiaqtalady?» dep jii suraq qoiylatynyn aitty.
«Shynynda da, kovid pen pandemiia bizdi kóptegen máselege betpe-bet ákeldi... Pandemiia – bul synaq jáne álem ony jeńe almai jatyr», – dedi ol.
Gebreiesýs álemniń pandemiiany toqtata almai otyrǵanynyń ózindik sebebi bar dedi. «Barlyq qajetti quraldar bar» bolǵanymen, «naqty saiasi mindettemelerdiń joqtyǵynan» osyndai jaǵdai oryn alyp otyrǵanyn alǵa tartty.
«Elderdiń úkimetteri, ásirese G20, ujymdyq erik-jiger tanytyp, adam ómirin saqtap qalý úshin barlyq sharany qoldanýy kerek. Olar vaktsinamen bólisip, virýsty aldyn alýǵa stimýl berse, pandemiiany birneshe aida baqylaýǵa ala alady», – dep qosty ol.
