Juqpaly aýrýlar aýrýhanasynyń ashylý rásimine qatysyp turǵan Túrkimenstan prezidenti Gýrbangýly Berdimuhamedov.
Dúniejúzilik densaýlyq saqtaý uiymynyń (DDSU) joǵary laýazym iesi Túrkimenstannyń "elde Covid joq" degen málimdemesine kúmándandy. Bul týraly BBC telearnasy habarlady, dep jazady Azattyq.
"Indettiń búkil álemge taraǵanyna eki jylǵa jýyq ýaqyt boldy. Ǵylymi turǵydan alǵanda, virýstyń Túrkimenstanda bolmaýy múmkin emes", - dedi doktor Ketrin Smollvýd. Ol DDSU-nyń tótenshe jaǵdai jónindegi aǵa ofitseri bolyp isteidi.
DDSU Túrkimenstannyń koronavirýs elde joq degen málimdemesine alǵash ret kúmán keltirip otyr, óitkeni Túrkimenstanda virýs resmi túrde tirkelmeidi, delingen telearna maqalasynda.
Ashhabad koronavirýs pandemiiasy bastalǵaly beri el aýmaǵynda koronavirýs tirkelgen joq deýmen keledi.
Ketrin Smollvýd 2020 jylǵy jazda DSSU missiiasyn Túrkimenstanǵa bastap barǵan.
Sol kezde uiym missiia ókilderi elde koronavirýs baryn rastai almady, biraq joqqa shyǵarǵan da joq degen. Degenmen delegatsiia Túrkimenstan biligine koronavirýs kezinde qalai áreket kerektigine qatysty keńesterin bergen.
Elde turǵyndar meditsinalyq maska taǵýǵa, áleýmettik araqashyqtyq saqtaýǵa mindettelgen. Eki jylda Túrkimenstanda eki ret lokdaýn jariialandy. Alǵashqysy segiz aiǵa sozyldy, ekinshisi úsh aidan beri jalǵasyp jatyr. Karantin shekteýleri turǵyndardyń aýyr jaǵdaiyn odan saiyn qiyndatyp jibergen.
