Eýropada COVID-19 virýsyn juqtyrýdyń jańa oqiǵalarynyń sany qysqardy, alaida kei jerlerde virýstyń taralý deńgeii áli de óte joǵary bolyp otyr. Vaktsinalaý óte baiaý júrip jatyr. Dúniejúzilik densaýlyq saqtaý uiymy kóptegen elderde karantin shekteýleriniń alyp tastalýy men shekaralardyń ashylýyna bailanysty virýstyń taralýy múmkindigin eskertip otyr. Sondyqtan sarapshylar adamdardy saiahatqa shyǵýdan bas tartyp, qyraǵylyq tanytyp, belgili saqtyq sharalaryn saqtaýǵa shaqyrady. Bul týraly BUU Jańalyqtar ortalyǵy habarlady.
Eýropada koronavirýs juqtyrý oqiǵalarynyń apta saiynǵy sany sáýir aiynyń ortasynan bastap 60 paiyzǵa – 1,7 mln-nan 685 myńǵa deiin qysqarǵan. Ásirese egde jastaǵy adamdar arasynda virýs juqtyrý jáne odan qaitys bolý oqiǵalarynyń sany aitarlyqtai qysqardy. Búginde 80 jastan asqandar aýrý juqtyrý sany jaǵynan tizimniń sońynda tur. 80 jastan asqan adamdardyń 75 paiyzyna vaktsina egildi. Alaida DDSU-da mundai jaǵdai buǵan deiin bolǵanyn eske salady. «Biz COVID-19 taralý deńgeiiniń tómendeýin baqylaǵan edik, biraq onyń sońynan densaýlyq saqtaý júiesi men ekonomikaǵa keri áser etken koronavirýstyń jańa tolqyny bastalyp ketti. Buǵan deiin jibergen qatelikterimizdi qaitalamaiyq», - dep úndedi DDSU-nyń aimaqtyq direktory Hans Kliýge. Ol óz sózinde Eýropalyq aimaqta COVID-19 virýsynyń 1,2 mln adamnyń ómirin qiyp áketkenin atap ótti.
Vaktsinalar COVID-19 virýsynyń barlyq nusqalaryna qarsy áser etedi. Budan bólek, alǵash ret Úndistanda anyqtalǵan B.1.617 nusqasy anyqtaldy.
Bul rette kóptegen elder karantin shekteýlerin birtindep alyp tastap, jazǵy ailarda jappai is-sharalardy josparlap otyr. Adamdar jii aralasyp, saiahatqa shyǵyp otyrady, bul virýstyń taralý qaýpin týdyrady. Sondyqtan vaktsina egilgen bolsa da, epidemiologiialyq sharalardy eki eselendirý – test ótkizip, sekvendeý, oqshaýlaý, bailanysta bolǵandardy anyqtap, olardy karantinge otyrǵyzý mańyzdy.
«Nóldik qaýip degen túsinik joq», - dep atap ótti Hans Kliýge. Vaktsina da, testileý de saqtyq sharalarynyń ornyn toltyra almaidy, sondyqtan maska taǵý, araqashyqtyqty saqtaý, qol jýý, bólmelerdi jeldetip, adam kóp júretin jerlerge barmaý qajet. Aita ketsek, Eýropada vaktsinalaý óte biaý júrip jatyr: vaktsinanyń bir dozasyn aimaq turǵyndarynyń tek 23 paiyzy alǵan, al tolyq ekpe alǵandar sany tek 11 paiyz ǵana.
DDSU maquldaǵan vaktsinalardyń COVID-19 virýsynyń barlyq nusqalarynan qorǵaityny jaqsy jańalyq, alaida eýropalyqtardyń basym bóligi áli de ekpe saldyrtqan joq.
Vaktsinalaýdyń tómen qarqyny men qazirgi jaǵdaidy esepke ala otyryp, DDSU belsendi saiahattaýǵa keńes etpeidi.
