Dúniejúzilik densaýlyq saqtaý uiymy (DDSU) juma kúni maskaǵa degen ustanymyn ózgertti. Endi halyqaralyq uiym úkimet ókilderine qoǵamdyq oryndarda matadan tigilgen maska taǵyp júrýdi mindetteýdi usynyp otyr.
Bul týraly búgin bbc agenttiginen málim boldy. Agenttik taratqan málimetterge qaraǵanda, qazirgi tańda Úndistan men Iranda virýs juqtyrǵandar sany artyp ketti. Sarapshylar bul indettiń ekinshi tolqynynyń belgisi degen boljam jasap otyr. Eýropalyq Odaq (EO) elderi 1 shildede shekarany ashý máselesin oilastyryp jatyr. Britaniia men Shvetsiia Eýropadaǵy barýǵa eń qaýipti memleketterdiń biri bolyp otyr.
Djon Hopkins ýniversitetiniń málimetterinshe, pandemiia bastalǵaly koronavirýsty álemde 6,6 mln adam juqtyryp, indettiń saldarynan 400 myńǵa jýyq adam qaitys bolǵan.
Virýs juqtyrǵandar sany jaǵynan qurlyqtar boiynsha kóshbasshy elder de belgili. Eýropada pandemiiadan eń kóp zardap shekken elder - Ulybritaniia, Italiia, Frantsiia jáne Ispaniia. Resei virýs juqtyrǵandar sany jaǵynan álemde úshinshi orynda tur. Alaida bul memlekette adam ólimi ózgelermen salystyrǵanda óte tómen. Soltústik Amerikada naýqastar sany jaǵynan aldyńǵy orynda AQSh tur. AQSh ta álemdegi Covid-19 indetinen eń kóp zardap shekken memleketterdiń biri. Indet eń kóp taraǵan elderdiń aldynda Ońtústik jáne Ortalyq Amerikada Braziliia men Meksika tur. Afrikada OAR, Egipet pen Nigeriia, Aziiada Úndistan men Iran tur.
Indettiń taraýymen kúres úshin «úlken jiyrmalyq» elderi men oǵan shaqyrylǵan memleketter 21 mlrd dollar bólýdi kózdep otyr. Mundai málimdeme G20 saitynda senbi kúni jariialandy.
Pandemiia tarai bastaǵan ýaqytta DDSU ókilderi maskany tek koronavirýs juqtyrǵan jáne aýrý simptomdary bar, sondai-aq naýqastarmen bailanystaǵy azamattar taǵýy kerek degen bolatyn. Halyqaralyq uiym ókilderi áýelde maskanyń virýstan qorǵaitynyna asa mán bermedi, olar kerisinshe, qoldy jýyp, taza ustap júrýdiń paidasy zor degen keńes berdi.
Alaida zertteý sharalary maskany durys qolodaný indetten qorǵanýdyń eń tiimdi joly ekendigin kórsetti.
Degenmen DDSU ókilderi jalǵaz maskanyń qaýipsizdik kepili bola almaitynyn, qaýipsizdik sharalaryn keshendi túrde qoldaný kerektigin aityp otyr.
