Dúniejúzilik densaýlyq saqtaý uiymy (DDSU) qytailyq Sinovac kompaniiasy ázirlegen koronavirýs vaktsinasyn maquldady. Bul –DDSU maquldaǵan qytailyq ekinshi ekpe. Buǵan deiin Sinopharm kompaniiasynyń vaktsinasy da paidalanýǵa usynylǵan.
Halyqaralyq uiym 1 maýsym kúngi málimdemesinde atalǵan vaktsina ekpe alǵandardyń shamamen jartysyn koronavirýstan qorǵady dep atap ótken. DDSU-nyń aitýynsha, synaqqa qatysqandardyń arasynda egde jastaǵylar az bolǵan. Sol sebepti uiym atalǵan vaktsina 60 jastan asqandarǵa qanshalyqty tiimdi bolatynyn aita almaidy.
"Biraq soǵan qaramastan DDSU jas boiynsha shekteý qoimaidy" dedi.
Uiym ózge elderden jinaqtalǵan derekke súiene otyryp, vaktsina jasy úlken adamdardy da qorǵai alýy múmkin dep boljam jasaidy.
DDSU maquldaǵan vaktsinalardy ádette kedei elderge ekpe satyp ápergisi keletin donorlar men BUU-nyń uiymdary satyp alady. Maquldaý vaktsina óndirgen kompaniialarǵa sondai múmkindikter beredi.
1 maýsymda Qazaqstanǵa atalǵan vaktsinanyń alǵashqy partiiasy (500 myń dozasy) jetkizilgen. Bul Qazaqstanda paidalanylatyn tórtinshi vaktsina. Eki dozalyq ekpe 14-28 kún aralyǵynda salynady. +2 +8 gradýs aralyǵynda saqtalady.
"Qytaida vaktsinalaý naýqanynyń aýqymdy túrde jalǵasyp jatqanyna qaramastan Qytai taraby jan-jaqty jáne strategiialyq áriptestik pen tatý kórshi qarym-qatynasty atap ótip, Qazaqstanǵa ózi ázirlegen vaktsinasyn jiberdi" delingen Qazaqstan densaýlyq saqtaý ministrligi taratqan resmi habarlamada.
DDSU buǵan deiin batys kompaniialary óndirgen Pfizer-BioNTech, Johnson & Johnson, Moderna jáne AstraZeneca vaktsinalaryn maquldaǵan.
