Ońtústik Afrika ǵalymdary koronavirýstyń óte tez juǵatyn jáne mýtatsiiaǵa jyldam ushyraityn shtamy anyqtalǵanyn habarlady. Ǵalymdar bul variantty vaktsinanyń ózi de tejei almaýy múmkin dep qaýiptenedi. Jańa shtamdy qadaǵalap otyrǵan Dúniejúzilik densaýlyq saqtaý uiymy (DDSU) 26 qarashada tótenshe jiyn ótkizetinin málimdedi. Onda jańa nusqanyń taralý máselesi talqylanady.
"Virýs mýtatsiiaǵa kóp ushyraǵan kezde taralý sipaty ózgeredi. Bul alańdatarlyq jaǵdai" dedi DDSU ókili Mariia Van Kerkhove.
B.1.1.529 dep anyqtalǵan jańa variant mýtatsiiaǵa eń kóp ushyraityn virýs nusqasy retinde tanylyp otyr. Variant Ońtústik Afrikanyń soltústigindegi Haýteng provintsiiasynda taralǵan. Bul aimaqqa Iohannesbýrg pen OAR astanasy Pretoriia da kiredi.
Ońtústik Afrikanyń indetpen kúres jáne innovatsiia ortalyǵynyń direktory, professor Týlio de Oliveiranyń aitýynsha, jańa variant mýtatsiiaǵa ushyraý deńgeii jaǵynan mamandardy shynymen de alańdatyp otyr. Virýsolog beisenbilik onlain brifing kezinde varianttyń ázirge 50 mýtatsiiasy anyqtalǵanyn aitty.
Ulybritaniia úkimeti 26 qarashadan bastap Ońtústik Afrika men Afrikanyń ózge de bes memleketinen keletin ushaqtarǵa tyiym saldy.
Mýtatsiialardyń edáýir bóligi "biologiialyq turǵyda mańyzdy, olar virýstyń ekpe, emdeý men taralýyna qatysty áreketin ózgerte alady" dedi Ulybritaniianyń densaýlyqty saqtaý agenttgi.
