Aldaǵy jarty jylda tabysy tómen jáne ortasha elder virýsty tekseretin 120 million qoljetimdi, sapaly jáne jyldam ekspress-test alady, dep habarlaidy news.un.org.
Bul týraly búgin arnaiy brifing barysynda Dúniejúzilik densaýlyq saqtaý uiymynyń Bas direktory Tedros Adhanom Gebreiesýs málimdedi.
«COVID-19 virýsyn neǵurlym tez anyqtasaq, qaýipti virýsty juqtyrǵan adamdardy oqshaýlaý jáne emdeý sharalaryn soǵurlym tez qabyldaimyz», - dedi ol.
DDSU basshysynyń aitýynsha, testileýdiń jańa ádistemesi shamamen 15-20 minýt ishinde senimdi qorytyndy alýǵa múmkindik beredi. Bul rette jańa testtiń baǵasy arzanyraq jáne kúrdeli tehnikalyq jabdyqtyń bolýyn qajet etpeidi.
«Bul testileýdi meditsinalyq zerthanalary men daiyn mamandary joq aýdandarda keńeitýge jol ashady», - dep atap ótti Tedros Adhanom Gebreiesýs.
Qazirgi kezde bir ekspress-testtiń baǵasy shamamen bes AQSh dollaryn quraidy. Bul buǵan deiin shyǵarylǵan testilerden áldeqaida arzan. DDSU aldaǵy ýaqytta baǵa odan áli de tómendeidi degen boljam jasap otyr.
DDSU basshysy 120 million testini jetkizý týraly kelisimge óndirýshi kompaniialar men Bill jáne Melinda Geits qory qol qoiǵanyn málimdedi.
«Resmi túrde rastalǵan kelisim bar, joba qarjylandyrý bastaldy, endi bul testilerdi tolyq kólemde satyp alýǵa qajetti somany jinaý kerek», - dedi ol.
