Búgin QR Úkimetiniń otyrysynda «Nurly jer» memlekettik baǵdarlamasynyń osy jyldyń toǵyz aiynda iske asyrylý qorytyndysyn shyǵarý barysynda Premer-Ministr Baqytjan Saǵyntaev turǵyn úi qurylysyn odan ári damytýǵa qatysty naqty tapsyrmalar berdi, dep habarlaidy "Ult aqparat".
Beiindi ministrlikterdiń jáne birqatar ákimderdiń baiandamalaryn tyńdaǵannan keiin, B. Saǵyntaev jalpy 9 aidyń qorytyndysy boiynsha «Nurly jer» memlekettik baǵdarlamasynyń barlyq negizgi baǵyttary boiynsha ósim baiqalatynyn atap ótti. Sonymen qatar, Premer-Ministr Úkimet músheleriniń nazaryn birqatar basty aspektige aýdardy.
Birinshi — bul Memlekettik baǵdarlamany iske asyrýǵa bólingen qarajatty igerý máselesi. QR Investitsiialar jáne damý ministrliginiń aqparatyna sáikes, birqatar óńirde 9 aidyń qorytyndysy boiynsha ótken jylǵy jáne josparly kórsetkishtermen salystyrǵanda qarajatty igerý qarqyny tómendegen.
Ótken jyly 11,2 mln sharshy metr turǵyn úi tapsyryp, joǵary kórsetkishke qol jetkizildi. Premer-Ministr biyl 12,1 mln sharshy metr paidalanýǵa berý kerektigin eske saldy.
Osyǵan orai, oblystardyń ákimderine turǵyn úidiń josparlanǵan kólemin tapsyrý jáne bólingen qarajatty tiimdi igerý úshin qajetti sharalardyń barlyǵyn qabyldaý tapsyryldy.
«Birinshi másele - qarajatty igerý. Baiandamada aitylǵandai, birqatar óńirlerde 9 aidyń qorytyndysy boiynsha qarajatty igerý qarqyny tómen. Alyp otyrǵan josparymyz - 12,1 mln sharshy metr. Byltyrmen salystyrǵanda 10%-ǵa joǵary. Al jyldyń aiaqtalýyna 2 ai ǵana qaldy. Qurmetti áriptester, ákim myrzalar, turǵyn úidiń josparlanǵan kólemin tapsyrý jáne bólingen qarajatty tiimdi igerý úshin qajetti sharalardyń barlyǵyn qabyldaýdy tapsyramyn», - dedi Premer-Ministr Úkimet otyrysynda.
Ekinshi — qurylys alańdaryna injenerlik kommýnikatsiialardy jetkizý máselesi. Bul kóppáterli úilerge de, jeke úi qurylysyna da qatysty. Biyl Memlekettik baǵdarlamany iske asyrýǵa bólingen biýdjet qarajatynyń jartysyna jýyǵy osy baǵytqa kózdelgen. Sonymen qatar, B. Saǵyntaev keibir óńirlerde qajetti infraqurylym bolmaǵandyqtan, salynyp daiyn turǵan úiler paidalanýǵa berilmei otyrǵanyn aitty.
Jeke turǵyn úi boiynsha osy jyly 40 myńnan astam jer telimi jelimen qamtamasyz etilýge tiis, 9 aida tek 40% ǵana qamtamasyz etilgen. Sondyqtan oblystardyń ákimderine osy máseleni qatań baqylaýǵa alyp, tapsyrmalardyń aldaǵy eki aida oryndalýyn qamtamasyz etý tapsyryldy.
«Bul, negizinen, kóppáterli úilerge jáne jeke úi qurylysyna qatysty. Biyl memlekettik baǵdarlamany iske asyrýǵa bólingen biýdjet qarajatynyń jartysyna jýyǵy osyǵan kózdelgen. Kei óńirlerde qajetti infraqurylym bolmaǵandyqtan salynyp, daiyn turǵan úiler paidalanýǵa berilmei otyr», - dedi ol.
Mysal retinde Premer-Ministr daiyn turǵan, biraq infraqurylymy joq nysandardy atap kórsetti.
«Petropavldaǵy «Bereke» shaǵynaýdanynda bes qabatty 3 úi bar. 230 páter 2017 jyldyń qarasha-jeltoqsanynda, bir jyl buryn salynyp bitken. Biraq berilmei otyr. Infraqurylym joq. Semeide 10 qabatty 3 úi 2017 jyly qarasha-jeltoqsanda salynǵan. Aqtóbedegi «Nur Aqtóbe» shaǵynaýdany 2018 jyldyń tamyz aiynda salynǵan. Shymkentte «Tulpar» shaǵynaýdanynda 3 qabatty 8 úi 2018 jyldyń sáýir-tamyz ailarynda salynǵan. Biraq infraqurylymy joq», - dedi B. Saǵyntaev.
Qurylysy aiaqtalýǵa jaqyn qalǵan obektiler Qaraǵandyda, Óskemende, Oralda, Semeide bar. Olardyń qurylysy qarasha-jeltoqsan ailarynda bitedi dep josparlanǵan. Alaida bul jerlerge de infraqurylym tartylmaǵan jáne abattandyrylmaǵan.
«Buǵan basa nazar aýdarý qajet. Jeke turǵyn úi boiynsha biyl 40 myńnan astam jer ýchaskesi infraqurylymmen qamtylýy tiis. Alaida 9 aidyń qorytyndysy boiynsha tiisti jer telimderiniń 40%-y ǵana qamtamasyz etilgen. Ákimder jyl sońynda belgilengen mejege jetemiz dep otyr. Muny qatań baqylaýǵa alý kerek», - dedi Baqytjan Saǵyntaev.
Aita, keteiik, Qazaqstan halqyna arnaǵan Joldaýynda Elbasy 2019 jyly jańa «Nurly jer» baǵdarlamasyn ázirleý mindetin qoidy. Ony óńirlik damý aspektilerin eskerip, jańa baǵyttarmen tolyqtyrý qajet. QR Investitsiialar jáne damý ministrligine jańa memlekettik baǵdarlamada turǵyn úi qurylysy men turǵyn úi-kommýnaldyq sharýashylyq máselesi boiynsha barlyq aspektilerdi qarastyrý tapsyryldy.
