"Daýys berýshilerdi májbúrleýge jáne olarǵa qysym kórsetýge jol berýge bolmaidy" - Álibek Áldenei

Osy sátke deiin el kóleminde 390 myńnan asa partiialyq óz tańdaýyn jasap úlgerdi. Bul – júiede tirkelgen barlyq adamnyń jartysyna jýyq, iaǵni 49%-dan astamy.

Internetke kirý múmkindigi joq jerlerde turatyn partiialyqtar erteń, 3 qazanda arnaiy sailaý ýchaskelerinde qaǵaz biýlletender arqyly daýys bere alady. Qolda bar aqparatqa sáikes, 82 214 partiialyq qaǵaz biýlleten arqyly daýys berý quqyǵyn paidalanady.

Aqparattyq júiedegi suranystardy óńdeýge bailanysty irkilister men qiyndyqtar boiynsha ahýaldy jan-jaqty túsindire keteiin.

Elektrondy formatta daýys berý Qazaqstanda ǵana emes, búkil Orta Aziiada tuńǵysh ret ótkizilip otyr. Praimerizdiń alǵashqy kúninen bastap biz júiege túsetin salmaqtyń asa aýyr bolatynyn túsindik.

Kesheden beri partiialyqtar men qoǵam tarapynyń nazary jappai praimerizde daýys berý barysyna aýdy. Bir mezette kóp adamnyń aqparattyq júiege kirip otyrýy tehnikalyq aqaýlyqtar týdyryp jatyr.

Sonymen birge kandidattar men olardyń senimdi tulǵalary da onlain rejiminde daýys berý barysyn jiti qadaǵalap otyrǵanyn bilemiz. Kesheden beri júiede turaqty túrde 50 myńnan astam paidalanýshy otyr. Jelilik aýyrtpalyq negizinen eki baǵytta: daýys berý protsesi men nátijesin belgileýge túsip tur.

Ótken túnde aqparattyq júieniń mamandary óndirtip jumys istedi. Suranystarǵa ońtailandyrý júrgizildi. Endi daýys berý jáne onyń nátijelerin qaraý fýnktsiialary eki server men internet-saitqa bólindi.

Daýys berý https://vote.primaries.kz/ arnaiy bólimi arqyly júrgizilip, al nátijeleri https://primaries.kz/ portalynda shyǵarylady.

Endi daýys berý nátijelerin primaries.kz saitynda ǵana kórýge bolady. Sondai-aq, daýys berý nátijelerin óńdeý men aralyq qorytyndylaryn shyǵarý kestesi de jańartyldy. Derekter árbir 30 minýt saiyn jańartylyp otyrady. Bir mezette óte aýqymdy kólemdegi suranystardyń túsýine bailanysty daýys berý nátijeleri baiaý júktelýi múmkin.

Tehnikalyq qyzmet jumysy táýliktik rejimge kóshirildi.

Taǵy da atap óteiin, «Praimeriz» júiesi daýys berýdiń qupiialylyǵyn qamtamasyz etedi. Árbir daýys esepke alynady, óńdeledi jáne júiede kórsetiledi.

Qurmetti partiialastar!

Praimerizde úgit jumystaryn júrgizý kezinde shynaiy básekelestik boldy dep sanaimyn. Daýys berýdiń sońǵy nátijeleri shyqqanǵa deiin áli ýaqyt bar. Tujyrym jasaýǵa, qorytyndy shyǵarýǵa áli erte. Barsha praimeriz qatysýshylaryn úgitteý qarqynyn báseńdetpei, sońǵy sátke deiin árbir daýys úshin kúresýge shaqyramyn!

Daýys berýshilerdi májbúrleýge jáne olarǵa qysym kórsetýge jol berýge bolmaidy. Siz úshin sheshim qabyldaýǵa eshkimniń qaqysy joq! Bul – sizdiń quqyǵyńyz jáne partiianyń ǵana emes, elimizdiń bolashaǵy úshin qabyldaityn sheshim úshin jeke jaýapkershiligińiz.

Ádil daýys berý talabyn buzýdyń qandai da bir jolyna qatań tosqaýyl qoiyldy. Aiypty bolǵandarǵa tiisti shara qoldanamyz. Partiialyq baqylaý komiteti kúsheitilgen rejimde jumys jasaýda. Ereje barshaǵa ortaq, eshkimge artyqshylyq berilmeidi.

Osy oraida, qadap aitatyn nárse – jalań aiyptaý bolmaýy tiis. Barlyq aryz-shaǵymdy naqty faktilermen negizdeý qajet.

Qazirgi kezde Partiialyq baqylaý komiteti Laýra Malikovanyń málimdemesinde aitylǵan daýys berýdi burmalaý faktilerine qatysty tekserý júrgizip jatyr. Eger olar rastalsa, onda tártip buzýshylyqqa jol bergen kandidat dodadan shyǵarylatyn bolady.

Mysaly, Túrkistan jáne Aqmola oblystarynda partiialyqtardy daýys berýge májbúrlemekshi bolǵan azamattar «Nur Otan»-nan shyǵarylyp, jaýapkershilikke tartyldy. Nur-Sultan qalasynda praimerizge qatysýshy 3 kandidat tirkeýden shyǵyp qaldy. Olardyń qatarynda Almaty aýdandyq filialy tóraǵasynyń birinshi orynbasary da bar. «Praimeriz» aqparattyq júiesinde partiia múshelerin tirkeý kezinde tártip buzýshylyqqa jol bergeni úshin Balqash qalalyq filialy tóraǵasynyń birinshi orynbasaryna, «Ardager» BPU, «Gúlder» BPU, «Stantsiia Balhash» BPU men «Shipager» BPU tóraǵalaryna tártiptik jaza qoldanyldy.

Tártip buzýshylyqtar men jazalaýlar týraly málimetterdi aqparat quraldary arqyly jariialap otyrmyz.

Kez kelgen tártip buzýshylyq boiynsha (800) 080 4441 (qońyraý shalý tegin) jedel jelisine nemese komek@nurotan.kz elektrondy pochtasyna habarlasýǵa bolady.