Kesheden beri áleýmettik jelide áriptesim ári joldasym Dáýren Abaevtyń málimdemesine qatysty túrli pikir aitylyp jatyr. Men Dáýren Áskerbekulymen biraz jyl qyzmettes boldym. Biz Prezident Ákimshiligine deiin de aqparat salasynda birge jumys istedik. Onyń memleketshil ári ulttyq múddege berik azamat ekenin jaqsy bilemin. Sondyqtan aitylyp jatqan máselege bei-jai qaramai, oǵan óz pikirimdi bildirgendi jón kórdim, - dep jazdy Prezidenttiń kómekshisi Erlan Qarin facebook-paraqshasynda.
Birinshiden, keshegi suhbatty muqiiat kórip shyqsańyz, Dáýren myrza memlekettik tildi múldem kemsitip otyrǵan joq, ulttyq múddemizdi de eshkimge jyǵyp bergen joq. Ol Qazaqstandaǵy orys tiliniń ahýalyn túsindirip, oǵan qysym jasalyp jatyr degen paiymnyń orynsyz ekenin anyq ári dáiekti túrde jetkizdi.Ekinshiden, meniń áriptesim qyzmet babyna orai, soltústiktegi kórshi elde bolyp jatqan aqparattyq dúrbeleńge bailanysty memlekettik biliktiń ustanymyn bildirdi. Bul ustanym bárińizge belgili – Qazaqstanda tiline, nanym-senimine bola adamdy kemsitýge jol berilmeidi. Munymen de eshkim daýlasa qoimaityn shyǵar.Úshinshiden, Dáýren Abaev jalpy ultshyldyqty qoǵamdyq qubylys retinde joqqa shyǵaryp, synaǵan joq. Onyń meńzep otyrǵany – ásire ultshyldyqtyń kórinisteri. Munyń týǵan eli men jerin súietin patriot azamattardyń ultshyldyǵyna esh qatysy joq. Al, saiasi jáne qoǵamdyq ideologiiada qandai da ásire kózqaras pen is-áreketten árine saq bolǵan jón, - dep jazdy Qarin.
Onyń oiynsha, bizdegi ultshyldyq memleketshildikpen astasyp jatýy qajet. Qoǵamdyq is-áreketimizdiń ólshemi memleketshildik bolýǵa tiis. Ultyn súigen adam, eń aldymen, memleketiniń bolashaǵyn oilaýy jáne soǵan qyzmet etýi kerek.
Biz qoǵamdyq diskýssiiada jalań urannan tereń ári baiypty dialogqa kóshýimiz kerek. Sondyqtan, barshańyzdy sońǵy pikirtalasqa sabyrmen qarap, áriptesim Dáýren Abaevtyń málimdemesiniń mánine tereń úńilýge, ony durys túsinýge shaqyramyn, - dedi Prezident kómekshisi.
Eske sala keteiik, buǵan deiin Prezident Ákimshiligi basshysynyń birinshi orynbasary Dáýren Abaevtyń aqyn, Halyqaralyq «Alash» syilyǵynyń iegeri Maraltai Raiymbekulyna jaýap bergen pikiri jariialanǵan edi.
