QR Prezidenti ákimshiliginiń basshysynyń birinshi orynbasary Dáýren Abaev Táýelsizdiktiń 30 jyldyǵyna arnalǵan ǵylymi-praktikalyq konferentsiiada erkindikti saqtaýdaǵy birliktiń mańyzyna toqtaldy, dep habarlaidy QazAqparat.
«Babalarymyz bórili bairaq astynda birikken tusta Baikaldan Balqanǵa deiingi alyp aýmaqty erkin jailady. Arǵy tegimiz saq, ǵun taipalary Eýraziia tósinde qýatty memleket quryp, tutas adamzat damýyna eleýli áser etti. Halqymyz orta ǵasyrlyq asa qýatty imperiia - Ulyq ulystyń ózegin qurady. Keiinnen osy jasampazdyq dástúrin jalǵastyryp, Qazaq handyǵynyń shańyraǵyn kóterdi. At tuiaǵyn tozdyryp, atan belin úzdirip júrip, urpaǵyna búgingi ulan baitaq jerimizdi mura etti. Al tatýlyqtyń týy qisaiǵanda azattyq ýystan shyǵyp ketti. Ásirese, jiyrmasynshy ǵasyrdyń synaǵy qazaq úshin óte aýyr boldy», - dedi Dáýren Abaev «Kóshbasshylyq. Turaqtylyq Progress» atty konferentsiiada.
Onyń aitýynsha, qazaq halqy HH ǵasyrdyń alǵashqy jartysynda asa zardapty synaqtan aman ótken.
«Bar-joǵy jarty ǵasyrdyń ishinde birneshe alapat qasiretti, saiasi qýǵyn-súrgindi, dúniejúzilik soǵystardy bastan keshirý, jurtymyzdy eseńgiretip tastaǵany jasyryn emes. Osyndai zobalańdar kezinde tilimiz ben salt-dástúrimizge súienip, ult retinde saqtaldyq. Tól qundylyqtarymyzǵa taban tirep, qaita eńse tiktedik, egemendikke qol jetkizdik. Degenmen, bostandyqtyń synaǵy bodandyqtan kóp bolmasa, az emes. Táýelsizdikti endi alǵan tusta Altaidan Kaspiige deiingi alyp aýmaǵymyz bolǵanymen, shekaramyz shegendelmegen edi. Jerimizdiń asty-ústi bailyqqa toly bolǵanymen, ony ózimiz igerip jatqan joq edik. Múmkindikterimiz mol bolǵanymen, qoǵamdaǵy sheshilmegen túiindi túitkilder odan da kóp bolǵan. Sondyqtan azattyqtyń tańy atqanda el tizginin Nursultan Nazarbaev siiaqty kóregen saiasatkerdik ustaýy qazaqtyń baǵy deýge bolady», - dedi Preziden ákimshiligi basshysynyń birinshi orynbasary.
