قر پرەزيدەنتٸ ەكٸمشٸلٸگٸنٸڭ باسشىسىنىڭ بٸرٸنشٸ ورىنباسارى دەۋرەن اباەۆ تەۋەلسٸزدٸكتٸڭ 30 جىلدىعىنا ارنالعان عىلىمي-پراكتيكالىق كونفەرەنتسييادا ەركٸندٸكتٸ ساقتاۋداعى بٸرلٸكتٸڭ ماڭىزىنا توقتالدى, دەپ حابارلايدى قازاقپارات.
«بابالارىمىز بٶرٸلٸ بايراق استىندا بٸرٸككەن تۇستا بايكالدان بالقانعا دەيٸنگٸ الىپ اۋماقتى ەركٸن جايلادى. ارعى تەگٸمٸز ساق, عۇن تايپالارى ەۋرازييا تٶسٸندە قۋاتتى مەملەكەت قۇرىپ, تۇتاس ادامزات دامۋىنا ەلەۋلٸ ەسەر ەتتٸ. حالقىمىز ورتا عاسىرلىق اسا قۋاتتى يمپەرييا - ۇلىق ۇلىستىڭ ٶزەگٸن قۇرادى. كەيٸننەن وسى جاسامپازدىق دەستٷرٸن جالعاستىرىپ, قازاق حاندىعىنىڭ شاڭىراعىن كٶتەردٸ. ات تۇياعىن توزدىرىپ, اتان بەلٸن ٷزدٸرٸپ جٷرٸپ, ۇرپاعىنا بٷگٸنگٸ ۇلان بايتاق جەرٸمٸزدٸ مۇرا ەتتٸ. ال تاتۋلىقتىڭ تۋى قيسايعاندا ازاتتىق ۋىستان شىعىپ كەتتٸ. ەسٸرەسە, جيىرماسىنشى عاسىردىڭ سىناعى قازاق ٷشٸن ٶتە اۋىر بولدى», - دەدٸ دەۋرەن اباەۆ «كٶشباسشىلىق. تۇراقتىلىق پروگرەسس» اتتى كونفەرەنتسييادا.
ونىڭ ايتۋىنشا, قازاق حالقى حح عاسىردىڭ العاشقى جارتىسىندا اسا زارداپتى سىناقتان امان ٶتكەن.
«بار-جوعى جارتى عاسىردىڭ ٸشٸندە بٸرنەشە الاپات قاسٸرەتتٸ, ساياسي قۋعىن-سٷرگٸندٸ, دٷنيەجٷزٸلٸك سوعىستاردى باستان كەشٸرۋ, جۇرتىمىزدى ەسەڭگٸرەتٸپ تاستاعانى جاسىرىن ەمەس. وسىنداي زوبالاڭدار كەزٸندە تٸلٸمٸز بەن سالت-دەستٷرٸمٸزگە سٷيەنٸپ, ۇلت رەتٸندە ساقتالدىق. تٶل قۇندىلىقتارىمىزعا تابان تٸرەپ, قايتا ەڭسە تٸكتەدٸك, ەگەمەندٸككە قول جەتكٸزدٸك. دەگەنمەن, بوستاندىقتىڭ سىناعى بوداندىقتان كٶپ بولماسا, از ەمەس. تەۋەلسٸزدٸكتٸ ەندٸ العان تۇستا التايدان كاسپييگە دەيٸنگٸ الىپ اۋماعىمىز بولعانىمەن, شەكارامىز شەگەندەلمەگەن ەدٸ. جەرٸمٸزدٸڭ استى-ٷستٸ بايلىققا تولى بولعانىمەن, ونى ٶزٸمٸز يگەرٸپ جاتقان جوق ەدٸك. مٷمكٸندٸكتەرٸمٸز مول بولعانىمەن, قوعامداعى شەشٸلمەگەن تٷيٸندٸ تٷيتكٸلدەر ودان دا كٶپ بولعان. سوندىقتان ازاتتىقتىڭ تاڭى اتقاندا ەل تٸزگٸنٸن نۇرسۇلتان نازارباەۆ سيياقتى كٶرەگەن ساياساتكەردٸك ۇستاۋى قازاقتىڭ باعى دەۋگە بولادى», - دەدٸ پرەزيدەن ەكٸمشٸلٸگٸ باسشىسىنىڭ بٸرٸنشٸ ورىنباسارى.
