Memlekettik baǵdarlamalardyń nátijesin bólingen qarajattyń jumsalý deńgeiimen ólsheý beleń alyp otyr. Prezident Ákimshiligi Basshysynyń birinshi orynbasary Dáýren Abaev «Ashyq dialog» suhbatynda osyndai oi aitty, dep habarlaidy QazAqparat.
«Kez kelgen PR-maman sizge repýtatsiiany jaqsartýdyń eń jeńil ári tóte joly «jyldam jeńisterge» baǵdarlaný ekenin rastap beredi. Bul - qysqa merzimge tiimdi, qoǵam jappai maquldaityn sharalar. Sondyqtan, kóbinde memlekettik organdardyń buqaralyq bastamalary jyldam jeńisterge baǵyttalady. Al uzaq ýaqyt boiy, meilinshi eleýsiz júretin júielik ózgeristiń mańyzy odan áldeqaida zor. Bári «Strategiialyq josparlaý jáne reformalar jónindegi agenttik qaida?» dep surap jatady. Dál osy organ qaiyrymy az ispen ainalysyp jatyr. Ondaǵy mamandar memlekettik reformalardyń oryndalý tásilin ózgertýge kirisip ketken. Memlekettik baǵdarlamalardyń tiimdiligi men iske asyrylýyn baǵalaýdyń jańa ólshemderi engizilýde», - dedi Dáýren Abaev.
Ol, sondai-aq, sońǵy kezde tiimdiliktiń basty ólshemi biýdjetti igerý bolyp ketkenin eske aldy.
«Aqsha jumsalǵan bolsa, qandai da bir nátije berdi dep qabyldaý qalypqa ainalǵan. Bulai bolmaýy kerek. Taǵy bir mysal retinde josparlaý isin alyp qaraiyq. Esepterden jii estimiz. Jospardy 5 paiyzǵa, keide tipti 10 paiyzǵa asyra oryndadyq dep jatady. Biraq bul mindetti túrde jaqsy iske asyryldy degen sóz emes. Kóbinese onyń basty sebebi nashar josparlaýdan týyndap jatady. Tipti keide maqsattyq kórsetkishterdi nátijege ikemdep jiberý jaittary kezdesedi. Sondyqtan, qaitalap aitamyn, osyndai qaltarystardyń bárimen atalǵan agenttik ainalysyp otyr. Osy turǵydan alsaq, bul árine, qaiyrymsyz jumys bolyp kórinedi», - dedi Prezident Ákimshiligi Basshysynyń birinshi orynbasary.
