Búgingi tańda Qazaqstanda taý kýrortyna degen suranys artyp keledi. «Shymbulaqqa» kelýshilerdiń shamadan tys kóbeiýi de osyny rastaidy. «Habar» telearnasyndaǵy «Ashyq áńgime» baǵdarlamasynda QR Aqparat jáne kommýnikatsiialar ministri Dáýren Abaev osyndai pikir aitty, dep habarlaidy QazAqparat tilshisi.
Suhbat kezinde Dáýren Abaev «Shymbulaq» taý kýrortyna kelýshiler shamadan tys artýyna jáne osyndai kýrorttarǵa degen suranystyń joǵary bolýyna bailanysty, Almatyda taǵy bir kýrort salý qajet bolyp otyrǵanyn aitty.
«Búgingi tańda biz týrizmdi damytý úshin qolda bar rekreatsiialyq múmkindikterdi paidalanýǵa tiispiz. Týrizmniń álemdik jalpy ishki ónimdegi úlesi 10 paiyzdan asady, bul 8 trln dollar degen sóz. Biz týrister úshin kúresýimiz kerek. Qala mańynda ornalasqan taýlar - Almatynyń basty artyqshylyǵy», - dedi ministr.
Almatyda kýrort salý máselesi áli talqylanyp jatyr, al kórshi elder taý-shańǵy indýstriiasyn qarqyndy damytýǵa kúsh salýda.
«Máselen, Ózbekstanda 100 mln dollardan astam investitsiia quiý arqyly úlken kýrort ashylmaq. Qyrǵyzstannyń Qarakól aýdanynda úlken eki kýrort salynyp jatyr. Ázerbaijanda endi ǵana ashylǵan taý-shańǵy kýrortyna 100 myń adam baryp úlgerdi», - dedi D.Abaev.
Ministrlik basshysy 2014 jyly usynylǵan taý-shańǵy kýrortynyń birinshi jobasynda tabiǵat landshaftyn birshama ózgertý kózdelgenin, negizinen qaltaly sheteldikterge arnalǵanyn eske saldy.
Budan tys, D.Abaev osy jobany iske asyrý kezinde barlyq ekologiialyq máseleler eskeriletinine senim bildirdi.
«Qazir ákimdik qurylys máselesin qaita qarap shyqty. Jyl boiy jumys isteitin, jurttyń bárine qoljetimdi kýrort salý josparlanyp otyr. Trassanyń jospardaǵy uzyndyǵy qysqardy, ǵimarattardyń aýmaǵy shamamen 10 ese kishireidi. Osynyń bári ekologiiaǵa áserdi azaitady», - dep túiindedi ministr.
