QR Prezidenti Ákimshiligi Basshysynyń birinshi orynbasary Dáýren Abaev Qazaqstannyń syrtqy saiasattaǵy róline baǵa berdi, dep habarlaidy QazAqparat.
«Prezident Toqaevtyń Túrki memleketteri yntymaqtastyq keńesine, qazirgi uiymyna qatysýy qoǵamda saiasattanýshylar arasynda da, qarapaiym internet-kommentatorlar arasynda da úlken qyzyǵýshylyq týdyrdy. Pikirler aýany negizinen jaǵymdy. Biraq Qazaqstan syrtqy saiasi yntymaqtastyqtyń basymdyqtaryn ózgertedi jáne túrki baǵyty álemniń basqa poliýsterindegi dostyqqa balama bolady degen tezister tuspaldanǵan jariialanymdar da boldy. Shynynda da solai ma?», - dep suraq qoidy jýrnalist «Habar» arnasyndaǵy «Ashyq dialog» baǵdarlamasynda.
«Birinshiden, biz syrtqy saiasattaǵy basymdyqtardy ózgertpeimiz. Túrki álemi qashanda onyń negizgi vektorlarynyń biri bolyp keldi. Bul týraly Elbasy da, Prezident te birneshe ret aitqan. Kaspiiden Alataýǵa deiingi búkil ońtústik shekaramyz túrki elderimen astasyp jatyr. Árine, olarmen tarihi, mádeni jáne rýhani bailanystar týraly aitpai-aq qoiaiyn. Qazaqstan eshqashan bireýge qarsy dos bolmaidy. Kerisinshe kópvektorly jáne pragmatizmniń úlgisi bolǵan syrtqy saiasatymyzdyń máni – álemdik saiasattyń barlyq «poliýsterimen» barynsha tiimdi jáne seriktestik qatynastar qurý bolyp otyr. Reseimen odaqtastyq qatynastarymyz bar, Qytaimen, AQSh-pen, Eýropalyq odaqpen strategiialyq áriptestik jolǵa qoiylǵan. Biz birneshe uiymdar men kelisimder aiasynda yntymaqtastyqty damytýdamyz. Sondyqtan, osyndai túsiniksiz tuspaldary bar maqalalar tyrnaq astynan kir izdeýmen birei», - dep jaýap berdi Dáýren Abaev.
