«Habar» arnasyndaǵy «Ashyq dialog» baǵdarlamasynda QR Aqparat jáne qoǵamdyq damý ministri Dáýren Abaev áleýmettik jelide qyzý talqylanǵan «eki siyr» daýyna qatysty pikir bildirdi, dep habarlaidy QazAqparat.
«Ashyq aitqanda, men osy másele ainalasyndaǵy daý-damaidy túsinbeimin. Eger Elbasy «Eńbek etpei sýdan balyq ta shyǵara almaisyń» degen maqaldy aitsa, ne bolar edi? Blogerler áleýmettik jelini qarmaq pen qurttyń sýretine toltyryp jiberer me edi? «Eki siyr» bul jerde aqparatty jeńil qabyldaný úshin keltirgen mysal ekeni aiqyn ǵoi. Bireý úshin eki siyr degen - aýlasyndaǵy baý-baqsha, bireý úshin - kólik jýatyn kásiporyn, jol boiyndaǵy dámhana. Bireý úshin - ismerlik, bireý úshin - azyq-túlik dúńgirshegi. Al eki siyrdan quralǵan sharýashylyqtardyń ómirlik qabiletin bar zeiinimen eseptep jatqan sarapshylardyń esine Tuńǵysh Prezidenttiń ózi aýyldan shyqqanyn salǵym keledi. Ol bala kúninen soǵystan keiin aýyr jyldarda ata-anasyna sharýashylyq júrgizýge kómektesti. Oǵan siyr degenniń ne ekenin, onyń qansha sút beretinin túsindirýdiń qajet joq», - degen Dáýren Abaev Elbasy osy sózi arqyly azamattardy óz kúshterine senýge shaqyrǵanyn jetkizdi.
«Ózińniń áreketsizdigińdi nashar sheneýnikter men nashar memleketke, nashar áleýmettik saiasatqa jabý árqashan ońai. Jaǵdaidy óz qolyńa alyp, jumys isteý áldeqaida qiyn. Qarasańyz, ol úshin ákimdik tarapynan da, ministrlikter tarapynan da, «Atameken» men «Damý» qory boiynsha da shaǵyn nesielendirý jáne shaǵyn biznesti qoldaý jóninen qazir barlyq jaǵdai jasalǵan. Qorytyp aitqanda, Elbasy adamdardy óz isin ashyp, jumys isteýge shaqyrdy. Eń mańyzdysy osy. Qalǵanynyń bári jelidegi qoqys qana», - dedi ministr.
