Elimizdiń joǵary oqý oryndarynyń jýrnalistka fakýltetinde oqityn stýdentter arasynda jumysqa ornalasýǵa múmkindik beretin baiqaý uiymdastyrylady. Bul týraly búgin Media bilim berýdi damytý máseleleri jónindegi vedomstvoaralyq keńeste QR Aqparat jáne kommýnikatsiialar ministri Dáýren Abaev aitty, dep habarlaidy QazAqparat tilshisi.
«Árine, qazirgi ýaqytta joǵary oqý oryndary berip jatqan bilimge kóńilimiz tolady. Degenmen, kóp jaǵdai stýdentterdiń ózderine de bailanysty ekendigin túsinemiz. Eger bazalyq dúnielerdi, pánderdi oqytýshylar úiretetin bolsa, qalǵan bilim men daǵdyny derbes alý kerek. Onyń ústine olardyń mundai múmkinshilikteri de bar», - dedi ol.
Osy rette Dáýren Abaev Aqparat jáne kommýnikatsiialar ministrligi jýrnalistika salasyndaǵy bilim berýdi damytý máselelerin talqylaýǵa jáne qajetti járdem berýge daiyn ekendigin aitty.
«Qazir biz máselelerdi qarastyryp, talqylaýǵa daiynbyz. Bir aidan keiin «Úrker» syilyǵyn tapsyrar kezde sol ýaqytqa daiyn bolsaq, baiqaý jariialaimyz. Bylai jasaiyq, baiqaý bolady jáne bas redaktorlar, telearnalardyń, radiolar men gazetterdiń basqarma ókilderinen jasaqtalǵan tóreshiler baiqaýdan ótken úzdik stýdentti jumysqa alýǵa mindetteme alady. Menińshe, bul shynaiy ári jaqsy baiqaý bolar edi. Stýdent joǵary oqý ornyn bitirgennen keiin jumysqa ornalasady. Mine, osyndai qaiyrymdy is jasai alamyz. Konkýrstyń kriteriilerin ázirleý qajet», - dedi ministr.
