QR Prezidenti Ákimshiligi basshysynyń birinshi orynbasary Dáýren Abaev «Ashyq dialog-2» suhbatynda Qazaqstan diplomattarynyń Taliban (Qazaqstanda jáne basqa da kóptegen elderde tyiym salynǵan) Úkimetimen bailanysqa shyǵýyna qatysty pikir bildirdi, dep habarlaidy QazAqparat.
«Memlekettiń apparatymyz bir jaǵynan el aýmaǵynda tálipterdiń uiymyna tyiym salady, ekinshi jaǵynan onymen bailanys ornatady. Qisyn qaida» dep surady suhbat tizginshisi.
Dáýren Abaev bul suraqtyń jaýap bere otyryp, Aýǵanstannyń Ortalyq Aziiadaǵy róline toqtaldy.
«Birinshiden, Aýǵanstan - Ortalyq Aziia aimaǵyndaǵy iri memleketterdiń biri. Ol jaqta bolyp jatqan oqiǵalarǵa kóz jumyp otyra almaimyz. Ózińiz tarazylap kórińizshi. 39 mln turǵyny bar. Bul Qazaqstan halqynan eki ese kóp degen sóz. Ol jaqtan bosqyndar aǵylǵanyn elestetip kórińiz. Árine, kez kelgen memleket úshin, jalpy álem qaýymdastyǵy úshin Taliban (Qazaqstanda jáne basqa da kóptegen elderde tyiym salynǵan) siiaqty qozǵalystyń bilikke kelýi asa bir jaǵymdy stsenarii dep aitýǵa kelmeidi. Biraq keibir toptarmen salystyrǵanda bul jol eń nashar emes ekeni kórinip qaldy. Eń bolmaǵanda tálipter kórshi memleketterdi basyp alýdy kózdep otyrǵan joq. Islam memleketteriniń birneshe formasy bar. Taliban ózderin birden «ámirlik» dep jariialady. Al kóbi halifat qurylady dep kútken bolatyn. Eger sál sheginis jasasaq, halifat degen búkil islam álemine yqpal etýdi kózdeitin júie. Sondyqtan onyń tabiǵatynda syrtqa basqynshylyqpen qaraý burynnan bar. Al ámirlik óz biligin tek óz aýmaǵynda ǵana júrgizýge beiildi. Bizde tyiym salynǵan Taliban qazirdiń ózinde qurylymyn «ámirlik» dep jariialady», - degen Prezident ákimshiligi basshysynyń birinshi orynbasary tálipter ketse, ornyna odan da qaýipti rejimder ornaýy múmkin ekenin eske saldy.
«Mysaly, ekonomikalyq qiyndyqtardyń saldarynan tálipterdiń rejimi qulaǵan jaǵdaida ornyn sol baiaǵy «IGIL» baspaitynyn kepildik joq. Jýyqta ǵana Aýǵanstan meshitterinde kóp adamnyń ómirin qiǵan jarylystar onda tálipterden de radikaldy saiasi kúshterdiń ambitsiiasy bar ekenin kórsetip otyr», - dedi Dáýren Abaev.
