Elordada ótken «Ulyq Ulys - Altyn Orda: Bastaýy, tarihy jáne murasy» atty halyqaralyq ǵylymi-tájiribelik konferentsiiada Prezident ákimshiligi jetkshisiniń birinshi orynbasary Dáýren Abaev Altyn Ordany qazaq tarihynyń eń negizgi taraýyna teńedi, dep habarlaidy "Ult aqparat".
Elordadaǵy Ulttyq akademiialyq kitaphanada ótken halyqaralyq sharaǵa AQSh, Ýkraina, Ózbekstan, Qyrǵyzstan, Tatarstan jáne Resei memleketterinen tarihshylar men zertteýshiler qatysyp, pikir almasty.
Jiyndy Prezident Ákimshiligi basshysynyń birinshi orynbasary Dáýren Abaev quttyqtaý sózimen ashty.
«Eger halyqtyń tutas tarihyn qalyń kitapqa teńesek, sonyń ishinde óte mańyzdy taraýy bolady. Ol taraý bolmasa kitaptyń mazmuny joǵalýy múmkin.
Ulyq Ulys – tól tarihymyzdyń osyndai mańyzdy taraýy. Dalalyq Rimge ainalǵan Uly imperiia, ártúrli tilde sóilep, árqily din ustanatyn kóptegen halyqty bir shańyraq astyna biriktirip, ozyq mádenietti dúniege ákeldi.
Onyń dáýirlegen tusynda qazaq halqynyń etnogenezdik portreti qalyptasty. Altyn Orda ýaqytynan beri kele jatqan simvoldardy qazir de kún saiyn kóremiz. Ulttyq valiýtamyz – teńgeniń ataýy sol kezeńge tiesili» - dedi Dáýren Abaev.
Prezident Ákimshiliginiń ókili Memleket basshysy rezidentsiiasy Batýdan Abylai hanǵa deiingi Altyn Orda men Qazaq handyǵy ámirshileriniń ordasy siiaqty atalatynyn eske saldy.
«Parasat pen tózimdilikke qurylyp, Hanafi mazhabyna negizdelgen dástúrli dinimiz Berke men Ózbek handardan muraǵa qalǵan.
Jańa elordamyz – Nur-Sultan qalasy – Uly dalada ásem shaharlar salǵan Ulyq Ulys bileýshileri ǵurpynyń jalǵasy.
Mysaly Saraishyq qalasy Joshy ulysynyń, Noǵai ordasy men Qazaq handyǵynyń rýhani astanasy boldy. Qazirgi Qyzylorda oblysy aýmaǵynda Jankent, Jent, Barchkent, Túrkistan óńirinde Syǵanaq, Sairam, Iassy, Sozaq siiaqty qalalar bolǵan» - degen Dáýren Abaev mundai qalalar elimizdiń soltústiginen de tabyla bastaǵanyna toqtaldy.
«Buǵan dálel – jaqynda ǵana Soltústik Qazaqstan oblysyndaǵy «Qyzyl oba» qorymynan shyqqan qundy jádigerler. Osylaisha biz babalarymyzdyń shetsiz-sheksiz aimaqty meken etken kóshpeliler emes, kerisinshe, óz ýaqytyndaǵy kóshpeli ómir men otyryqshy turmys saltynyń ozyq tustaryn úilestirip, imperiialyq deńgeide ústemdik qurǵan halyq bolǵanyn baiqaimyz« - dedi Dáýren Abaev.
