Kollaj: rus.azattyq-ruhy.kz
Almatylyq advokattardy soqqyǵa jyqty degen Májilis depýtaty Dáýlet Turlyhanovtyń ulyna qatysty tergeý aiaqtaldy. Qylmystyq is endi sotqa joldanady, dep habarlaidy "Ult aqparat" KTK telearnasyna silteme jasap.
Áskeri-tergeý basqarmasynyń málimetinshe, qatardaǵy jaýynger Nurasyl Bolat janjal bolǵan kúni áskeri jarǵyny buzyp, qalaǵa qashyp ketken. Tek tóbelesten keiin politsiia bólimshesine jetkizilgende bir-aq tabylǵan.
Al májilismenniń balasynan taiaq jegen zańgerler moraldyq shyǵyn retinde 25 million teńge suraǵaly otyr.
Qoǵamdyq rezonans týdyrǵan tóbeles aqpan aiynda bolǵan. Sol kezdegi video áleýmettik jelige endi tarap jatyr. Kadrden Dáýlet Turlyhanovtyń uly erli-zaiyptyǵa judyryq ala júgirgeni baiqalady. Aldymen jigitti tópelep, sosyn onyń áielin aýyr soqqysymen sulatyp túsirgen.
Soqqydan esin joǵaltqan Anna Chernova eki ai ótse de, tamaqty durys shainai almai qinalyp júr. Tóbeleste jaǵy men iyǵyn jaraqattaǵan áiel endi sotta moraldyq shyǵyn retinde 25 million teńge suramaqshy. Jábirlenýshi tarap bul qarajatty qaiyrymdylyqqa jumsaýdy josparlapty.
"Basqa azamattar siiaqty biz de quqyǵymyzdy paidalandyq. Moraldyq shyǵyndy ótep berýdi suradyq. Somasyn aittyq. Meniń Instagram paraqshamda oqyrman sany kóp. Kómek suraityn jandar jeterlik. Ózim de birneshe qaiyrymdylyq qoryn bilemin. Sot sheshimimen bekitilgen shyǵyn kólemin aiyptalýshy tarap bizdiń qolymyzǵa ustatpaimyz dese de kelisemiz" - deidi ol.
Keleńsiz jait «tiispe» degen bir aýyz sózden bastalǵan eken. Ataqty sportshynyń uly bir qyzdy julqylap jatqanyn kórip, arasha túsken erli-zaiyptylar aqyry ózderi ońbai taiaq jedi. Sondyqtan olar aqsha bergenniń ózinde aiyptalýshy tarappen tatýlaspaimyz, kimniń balasy bolsa da, zań aldynda tiisti jazasyn alý kerek degen ustanymda.
"Bizdi uryp jatqan videony kim jáne ne úshin salǵanyn bilmeimiz. Sosyn ol bolǵan oqiǵanyń bir bóligi ǵana. Bizde odan da soraqy videolar bar. Kózdegenimiz aqsha emes — ádildik. Bul keleńsiz jait barlyǵyna sabaq bolý kerek. Turlyhanovtyń balasy jazasyz qalmaý kerek. Isti sońyna deiin jetkizemiz" - deidi Oleg Chernov.
Jambyl oblysynda áskeri boryshyn ótep júrip janjalǵa aralasqan sarbaz Nurasyl Bolatqa densaýlyqqa qasaqana aýyrlyǵy ortasha ziian keltirý baby boiynsha aiyp taǵylǵan. Áskeri-tergeý basqarmasynyń málimetinshe, tóbeles kúni qatardaǵy jaýynger keshke deiin suranyp, áskeri bólimge qaityp oralmaǵan. 19 jastaǵy jigit politsiia bólimine jetkizilgende ǵana onyń Almatyda júrgenin bir-aq bilipti.
"Jedeltergeý amaldary boiynsha kúdikti retinde Bolat N.D. kinási tolyqtai dáleldendi. QK 107-baby, 2-tarmaǵymen júrgizilgen tergeý aiaqtaldy. Qazirgi kezde ispen tanysý júrip jatyr. Bári bitkennen keiin Almaty áskeri sotyna jiberemiz. Qazir Bolat N.D. áskeri bólim baqylaýynda" - deidi QR IIM Ońtústik-óńirlik áskeri-tergeý basqarmasynyń bastyǵy Muhit Jaýǵashev.
Jalpy bul bap boiynsha úsh jylǵa deiin bas bostandyǵynan aiyrý jazasy qarastyrylǵan.
Aita keteiik, osyǵan deiin Májilis depýtaty Dáýlet Turlyhanov «Balam kámeletke tolǵan, sondyqtan qolymen istegendi moinymen kóteredi» dep pikir bildirgen bolatyn.
