Imanbek laqapatymen tanylǵan, "Gremmi" syilyǵyn jeńip alǵan tuńǵysh qazaqstandyq Imanbek Zeikenov Qazaqstannyń halyq ártisi Roza Rymbaevanyń sózine jaýap berdi, - dep habarlaidy Tengrinews.kz.
Instagram-daǵy effectiverecords tikelei efirinde júrgizýshi Imanbekten halyq ártisiniń pikiri týraly ne oilaitynyn suraǵan.
"Birinshiden, ol men úshin eresek adam, aǵa býyn, men ony eshqashan synamaimyn. Qalai aitarymdy da bilmeimin. Men daýlaspaimyn, bul onyń pikiri. Tyńdap, túsindim", - dedi Imanbek.
Aita keteiik, Roza Rymbaeva Azattyq Rýhy portalyna bergen suhbatynda Zeikenovtiń jetistigi "sáttilik" qana dep ataǵan edi.
"Kerek kezde, kerek jerde bolý. Joly bolyp ketti. Onyń ústine ol - kásibi mýzykant emes. Bul - jai ǵana sáttilik. Yrǵaǵyn, mánerin aýystyrdy da qoidy, munyń bári kompiýterde jasalady. Ony remix retinde baǵalady, avtor retinde nemese oryndaýshy, avtor-óńdeýshi retinde emes. Joq, ol tek jyldamdyǵyn údetip, balalarǵa tán án shyǵyp, yrǵaǵy aýysty", - degen edi Rymbaeva.
Aita keteiik, Imanbek Zeikenov 2000 jyly 21 qazanda Pavlodar oblysy Aqsýda dúniege kelgen. Onyń arnaiy mýzykalyq bilimi joq, tek segiz jasynda ákesi gitara oinaýdy úiretkenin aitady. 9-synyptan keiin Imanbek Pavlodar kólik jáne kommýnikatsiialar kolledjine oqýǵa túsken. 2017 jyldan beri mýzykamen ainalysatyn ol temirjol qyzmetin de tastamaǵan. Oqýmen qatar ol Aqsýdaǵy temirjol stantsiiasynda jumys istegen. Bos ýaqytynda túrli mýzykaǵa remiks jasaýmen ainalysqan. Mýzyka tili boiynsha arnaiy oqýy joq, bárin YouTube hostingindegi videolardan úirengen.
Al 2019 jyly Imanbek ánshi SAINt JHN-niń Roses atty ánin estigen. Ol kezde shyqqanyna úsh jyl bolǵan bul ándi kóbi bile bermeitin.
"Trektiń ózinde dybystyń keibir siqyry jasyrynǵandai, ol daýystyń tempi men tembrin biriktiretin erekshe formýla siiaqty", - dedi Imanbek The Variety basylymyna bergen suhbatynda. Osylaisha, sol kezde Imanbekti álemge tanytqan, "Gremmi" júldesine jetkizgen Roses remiksi dúniege kelgen. Ol remiksti búkil dúnie júzi tyńdaitynyna kúmánmen qarap, tek "VKontakte" jelisinde jariialaǵan. Artynsha úlken paraqshalar osy remiksti qoldana bastaǵan.
