19 naýryz kúni Almatyda eshbir qujatsyz tapansha men oq-dárini emin-erkin tasymaldaǵan kólik Taldyqorǵannyń eks-ákimi Dastan Shaltabaevtyń ulyna tiesili bolyp shyqty. Biraq kólikti sol sátte eks-ákimniń uly emes, kýrstastary tizgindegen, dep habarlaidy QazAqparat tilshisi.
Tekserý nátijesine sáikes, Taldyqorǵannyń eks-ákimi Dastan Shaltabaevqa qatysty zańbuzýshylyqtar oryn almaǵan.
«Almaty oblysynyń ákimdigi Dastan Shaltabaevqa qatysty qyzmettik teskerý júrgizgen. Tekserý nátijesinde D. Shaltabevtyń tarapynan zańbuzýshylyqtar oryn almaǵany belgili boldy. 19 naýryz kúni 055 QQQ 05 nómirli Toyota Camry avtokóligin Sharipov esimdi azamat tizgindegen. Dastan Sharipov - Shaltabaevtyń ulynyń kýrstasy. Qyzmettik tekserý qujattaryna sáikes, kórsetilgen ýaqytta eks-ákimniń uly Turarbek T. D. ál-Farabi atyndaǵy ýniversitette sabaqta bolǵan», - dedi Memlekettik qyzmet isteri jáne sybailas jemqorlyqqa qarsy is-qimyl agenttigi Almaty oblysy boiynsha departamentiniń ókili Symbat Israpýlova.
Symbat Israpýlovanyń aitýynsha, kóliktiń ishinde taǵy eki jolaýshy bolǵan. «Kólikte taǵy Beisen S. jáne Maqul N. degen azamattar bolǵan.
Maqul degen azamatqa qatysty qylmystyq is qozǵaldy. Travmatikalyq qarýdy zańsyz saqtaǵany úshin QR QK 287-babynyń 2-tarmaǵyna sáikes Maqul N-nyń ústinen tergeý júrip jatyr. Al kólikti tizgindegen Dastan Sharipovqa qatysty ákimshilik quqyq buzýshylyq kodeksiniń úsh baby boiynsha is qozǵalǵan. Budan bólek, mashinadan tabylǵan 055 TTD 05 jáne 007 TTD 02 vip-nomerlerin Almaty oblysy politsiia departamenti ákimshilik politsiia basqarmasy tirkeýden alyp tastaǵan. Dastan Shaltabaevtyń 2000 jáne 2001 jyly týǵan balalarynyń jol erejesin buzyp, ákimshilik jaýapkershilikke tartylǵany jóninde málimet departamentte joq», - dedi atalǵan vedomstvanyń ókili.
Esterińizge sala keteiik, 28 naýryz kúni Almaty qalasynyń tártip saqshylary aldyńǵy terezesi qarańǵylanǵan Toyota Camry kóligin toqtatqan. Biraq ony tizgindegen azamatta júrgizýshi kýáligi bolmaǵan jáne kóliktiń ishinen travmatikalyq tapansha men dollar valiýtalary tabylǵan. Artynsha býma-býma aqshanyń jalǵan ekeni jóninde resmi málimdeme berildi.
Al 29 naýryz kúni Taldyqorǵan qalasynyń ákimi Dastan Shaltabaevqa qatysty qyzmettik tekseris bastaldy. 12 sáýir kúni Taldyqorǵan qalasynyń ákimi aýysty. Taldyqorǵannyń ákimi bolǵan Dastan Shaltabaev Almaty oblysynyń ákimi Amandyq Batalovtyń keńesshisi bolyp taǵaiyndaldy.
