«Qoǵamdyq kelisim» RMM direktory Ǵalymjan Qusmanǵali mediatsiia kabinetteriniń turmystyq daý-damailardy sheshýge qandai kómek kórsetkenin aityp berdi, dep habarlaidy QazAqparat.
«Qazirgi ýaqytta búkil oblys ortalyqtarynda 20 mediatsiia keńesi, bir respýblikalyq jáne 19 óńirlik kabinet bar. Assambleia tirkeýinde 2318 mediator bar, olar 2016 jyldan bastap 134 myń ótinishti qaraǵan, onyń 51%-y mediativtik ymyraǵa kelý jolymen sheshildi, qalǵan 49%-yna mediator konsýltatsiia bergen», - dedi Ǵalymjan Qusmanǵali Ortalyq kommýnikatsiialar qyzmetinde ótken baspasóz máslihatynda.
Sonymen birge spiker mediatsiia kabinetteriniń tiimdiligin kórsetken birneshe mysaldy keltirdi.
«Birer jyl buryn oblys ortalyqtarynyń birinde urlyq bolyp, eki jasóspirim kottedjdi tonap ketken edi. Saiajai ieleri quqyq qorǵaý organdaryna júgindi jáne jasóspirimder ustaldy. Politseiler máseleni sheshý úshin mediatsiia kabinetine júginýdi usyndy. Mediatsiia kabinetinde bul jasóspirimderdiń turmysy nashar otbasynan shyqqany belgili boldy. Onyń ústine, bir jasóspirimniń ata-anasy joq. Nátijesinde saiajai iesi ótinish jazýdan bas tartyp qana qoimai, jetim jigitti qamqorlyǵyna alyp, kolledjdegi oqý aqysyn tólep berdi», - dedi Qusmanǵali.
«Qoǵamdyq kelisim» basshysy mediatorlar daýdy sotsyz rettegen taǵy bir jaǵdai týraly aityp berdi.
«Taǵy bir jaǵdai: nóser jaýyn jaýyp, kópqabatty úidiń tóbesinen sý aǵyp, 60 páter zardap shekti. Munyń PIK pen páter ieleri arasyndaǵy daýly jaǵdai ekeni túsinikti. Menshik ieleriniń biri mediatsiia kabinetine júginip, zardap shekkender men kooperativ tóraǵalaryn shaqyrdy. Eki kúnde páter ieleri men PIK uiymdastyrǵan mediativtik kelisim jasaý arqyly janjaldy sheshýge múmkindik týdy. Eger bul adamdar sotqa júginse, sot isi birneshe aiǵa sozylyp, qarjylyq shyǵyn bolar edi. Al mediatordyń qyzmeti tolyq tegin kórsetildi», - dedi Qusmanǵali.
