Foto: sports.ru
Qazaqstandyq fýtbolshy Dastan Satpaev mansabyn 2026 jylǵa deiin «Qairatta» jalǵastyrady, sodan keiin Londonnyń «Chelsi» klýbyna aýysady. Sports.ru málimetinshe, fýtbolshy aǵylshyn klýbymen bir maýsymǵa uzartý múmkindigi bar bes jyldyq kelisimshartqa qol qoiǵan.
Jas oiynshynyń ailyq jalaqysy shamamen 14 myń fýntty quraidy (shamamen 8,7 million teńge), onyń 12 myńy ata-anasynyń shotyna túsip, Dastanǵa 22 jasqa tolǵanda ǵana qoljetimdi bolady. Alaida, ol kámelettik jasqa tolǵanǵa deiin «Qairat» sapynda jalǵa oinaidy.
«Dastan 18 jasqa deiin „Qairatta“ qalady, biraq „Chelsi“ oǵan arnaiy jeke baǵdarlama boiynsha jumys isteitin jattyqtyrýshy jiberedi. Eki jyl boiy olar ony jetildiredi. Bul jattyqtyrýshy onymen birge jumys istep, Qazaqstanda bizdiń bazamyzda ómir súrip, onyń damý protsesin baqylap, qajetti qosymsha daiyndyq júrgizedi. Barlyq shyǵyndy londondyq klýb óz moinyna alady. Dastannyń matchtarǵa qatysýy „Chelsi“ jattyqtyrýshysymen kelisiledi», – dedi «Qairat» baqylaý keńesiniń tóraǵasy Qairat Boranbaev.
Boranbaevtyń aitýynsha, eger Ulybritaniiada jumys isteýge ruqsat alý múmkindigi erterek paida bolsa, fýtbolshy 2026 jylǵa deiin Londonǵa bara alady.
«Qazirgi tańda biz Angliia fýtbol federatsiiasynan kelisim qujattaryn aldyq, kelisimshart tolyq maquldandy, endi Dastan „Chelsidiń“ resmi oiynshysy bolyp tabylady. Alaida, kelisimshart boiynsha ol 18 jasqa deiin bizde jalǵa oinaidy», – dep tolyqtyrdy Boranbaev.
Osylaisha, Dastan Sátpaev kámelet jasqa tolǵanǵa deiin «Qairatta» oinap, «Chelsidiń» jattyqtyrýshysynyń jetekshiligimen damýǵa múmkindik alady.
