Elimizdiń aýmaǵynda júrgizilgen «Dármek» operatsiiasy barysynda 40 meditsina qyzmetkeri ákimshilik jaýapkershilikke tartyldy. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy QazAqparat.
«Esirtki quraldarynyń, psihotroptyq zattar men prekýrsorlardyń resmi ainalymyndaǵy zań buzýshylyqtardy anyqtaý maqsatynda Ishki ister ministrligi «Dármek» arnaiy aýqymdy operatsiiasyn júrgizdi. 5 kún ishinde 877 nysan, onyń ishinde dárihanalar men qoimalar, emdeý-aldyn alý mekemeleri jáne ónerkásiptik kásiporyndar tekserildi. Qazirgi ýaqytta «dárihanalyq» nashaqorlyq keń tarala bastaǵany belgili. Sondyqtan politseiler esirtkige uqsas mas qylatyn jáne táýeldilikti týǵyzatyn dári-dármekterdi retseptisiz bosatý faktilerin anyqtaýǵa basa nazar aýdardy», - dedi resmi ókil aptalyq brifing barysynda.
Nurdildá Orazdyń dereginshe, esepke alynǵan preparattardy retseptisiz bosatýdyń 56 faktisi anyqtalyp, 12 tonna prekýrsordyń ainalymy shekteldi. Operatsiia barysynda 21 qylmystyq quqyq buzýshylyq anyqtaldy. Onyń ishinde 17-si esirtki quraldarymen jumys isteý erejelerin buzý, 4-eýi ýly zattardyń, sondai-aq esirtki quraldaryn, psihotroptyq zattardy daiyndaý úshin paidalanylatyn zattardyń zańsyz ainalymyna qatysty boldy.
«Baqylaýdaǵy zattar ainalymy salasynda 99 ákimshilik quqyq buzýshylyq anyqtaldy. Onyń ishinde obektilerdi tehnikalyq nyǵaitý talaptaryn buzýǵa qatysty 34 fakti, litsenziialaý normalaryn buzýǵa bailanysty 9 fakti tirkeldi. Ákimshilik jaýapkershilikke 40 meditsina qyzmetkeri tartyldy. Máselen, Atyraý turǵyny psihotroptyq preparattardy satýmen ainalysqan. Odan kúshti áser etetin 58 plastinka men 31 quty preparattar tárkilengen», - dedi ol.
Onyń atap ótýinshe, saqtaý talaptary buzylǵan nemese quramynda esirtki bar satylymdaǵy barlyq preparattar ainalymnan alyndy.
«Atap aitqanda, 2 myńnan astam esirtki quraldary ampýlasy, 1600-den astam tabletka jáne 1800 psihotroptyq zattar ampýlasy tárkilendi», - dedi resmi ókil.
