Túrkistan oblysynyń ákimi Darhan Satybaldy Túrkiianyń Iznik qalasynda ótken IV Dúniejúzilik kóshpendiler oiyndarynyń chempiondary men júldegerlerin qabyldady, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Dúbirli dodada el namysyn qorǵaǵan júldegerlerdiń jeńisin joǵary baǵalaǵan aimaq basshysy ońtústik óńiriniń sportshylaryna qarjylai sertifikat pen oblys qurama komandasynyń biryńǵai formasyn tabystady.
«Sizder Túrkistan oblysynyń ǵana emes, kúlli Qazaq eliniń atyn shyǵaryp júrsizder. Kókpardan birinshi oryn alǵandaryńyzdy estip, eńsemiz kóterilip qaldy. Jeńis qutty bolsyn! Jalpy buryn qazaqtyń ómir saltynyń ózi sportqa negizdelgen ǵoi. At sporty, jekpe-jek túrlerinen myqty sportshylarymyz kóp. Jamby atýdan júlde alǵan baýyrymyzdyń da jetistigi qýantady. Óte qiyn sport túrinen eki medal enshilep otyr. Ulttyq sportty ulyqtaǵan barsha júldegerlerdi shyn júrekten quttyqtaimyn! Jýyrda ǵana qazaq dalasyn dúbirge bólegen «Uly dala joryǵy» marafon-báigesinde de Túrkistan oblysynyń sportshylary 3-oryndy iemdendi. Biz sport salasyn árdaiym qoldaimyz. Kelesi Dúniejúzilik kóshpendiler oiyndaryn Túrkistan oblysynda ótkizýge usynys berip jatyrmyz. Bairaqty básekelerdi qabyldaý arqyly eldiń abyroiy kóteriledi», – degen Darhan Satybaldy jattyqtyrýshylar men sportshylardyń usynystary men tilekterin tyńdady.
Kóshpendiler oiyndarynda kókpar sporty boiynsha Qazaqstan qurama komandasy 1-oryndy jeńip alǵan bolatyn. Qurama sapynda Arman Jamalbekov, Abylaihan Nyshanbekov, Dáýlet Aitan jáne Ádilet Mamyt syndy Túrkistan oblysynyń 4 sportshysy jeńisti sátti jaqyndatýǵa eseli úles qosty. Al Eralhan Aikóz jamby atýdyń túrik stili boiynsha «qabaq» atýdan – ekinshi oryn, «tabla» atýdan úshinshi orynǵa ie boldy.
Aita keteiik, kóshpendiler oiynyna álemniń 102 elinen 3 myńnan astam sportshy qatysqan. Qazaqstannyń atynan 50 sportshy kókpar, qazaq kúresi, dástúrli sadaq atý, jamby atý, kók bóri sport túrlerinen baq synady.
