Úkimettik emes uiymdardy qarjylandyrý jumystary 14 baǵyt boiynsha júrgizilip jatyr. Bul týraly Elbasy Nursultan Nazarbaevtyń qatysýymen ótip jatqan VIII Azamattyq forýmda Qoǵamdyq damý ministri Darhan Káletaev aityp berdi, dep habarlaidy QazAqparat tilshisi.
Qazirgi tańda azamattyq qoǵamdy damytýdyń 2016-2020 jyldarǵa arnalǵan ulttyq jospary júzege asyrylyp jatyr. Osynyń arqasynda ÚEU-nyń sapaly túrdegi ósiminiń kezeńi bastalyp ketti. 2003 jyldan beri Qazaqstanda ÚEU-nyń sany 5 myń bolsa, qazirge deiin 22 myńǵa jetti. Memlekettik áleýmettik tapsyrys boiynsha qarjylandyrý kólemi 2018 jyly 22 mlrd teńgege jetti. Búgingi tańda ÚEU-lardy qarjylandyrý jumystary 14 baǵyt boiynsha júrgizilip jatyr. Sonyń ishinde osy qarjylandyrýdyń úshten bir bóligi áleýmettik jobalarǵa jumsalsa, odan keiingisi bilim, jastar saiasatyn qoldaýǵa, azamattyq qoǵamdy damytýǵa, azamattardyń quqyǵyn qorǵaýǵa bólinýde», - dedi Darhan Káletaev.
Qoǵamdyq damý ministriniń aitýynsha, jalpy ÚEU sektory instýttsionaldyq turǵyda qalyptasyp qoiǵan.
«Bizdiń osy forým aldynda óńirlerge jasaǵan saparlarymyz úkimettik emes uiymdardy elimizdegi protsesterge kóbirek qatystyrý kerektigin kórsetip otyr. ÚEU qazirgi tańda tek granttardy alatyn ǵana uiym emes, úlken protsesterdiń qatysýshysyna ainaldy. Qazirgi tańda qoǵamdyq keńesterdiń sany 229-ǵa jetse, olardyń quramynda 4 myńǵa tarta adam jumys isteýde. 20 ortalyq memlekettik organda jáne 313 jergilikti atqarýshy organda ÚEU-larmen jumys isteýge ýákiletti institýttar engizildi», - deidi ministr.
Darhan Káletaev keshe bastalǵan forým týraly keńirek aita kele, birshama taqyryptar talqylanǵanyn atap ótti.
«Biz úkimettik emes uiymdardyń jumysyna qatysty birshama suraqtardy talqyladyq. Sonymen birge, ÚEU-lardy qarjylandyrýdyń qun jaǵynan yńǵaily qaǵidatpen emes, joǵary sapaly qyzmet úshin berý máselesi qaraldy. ÚEU-dardy salyqtyq jáne qarjylyq turǵyda yntalandyrý bastamalary kóterildi. ÚEU-lardy qoldaýdaǵy biznesti qoldaý qarastyryldy. Halyqaralyq donorlyq uiymdarmen seriktesý máselesin talqyladyq. Sonymen birge, ÚEU ókilderi áleýmettik ÚEU-larǵa mikronesielerdi bólýdi usynady. Startap-jobalardy qoldaý úshin innovatsiialyq granttar men venchýrlyq kapitaldy bólý ideialary kóterilip jatyr. Iaǵni, aitylyp jatqan máselelerdiń bári de memleket pen ÚEU-lardyń birlesken jumysy mehanizmin jandandyrýdy kózdeidi», - dedi D.Káletaev.
