Áleýmettik jeli qoldanýshylarynyń biri qyzynyń dáriger emine jazyp bergen dári baǵasy ne sebepti eki dárihanada eki túrli ekenine shaǵymdandy. Bul suraqqa Nur-Sultan qalasy Taýarlar men qyzmetterdiń sapasy men qaýipsizdigin baqylaý departamentiniń baspasóz qyzmeti jaýap berdi.
Facebook-tegi «Astana, hochý pohvalit/pojalovatsia» tobyna Dinara Abdramanova esimdi qoldanýshy dári-dármek baǵasynyń ártúrli bolýyna qatysty shaǵym jazdy.
«Maǵan dárihanalardy kim, qalai tekseretini qyzyq. Jaqynda balalar kardioortalyǵynda driger qabyldaýynda boldym. Meniń qyzyma – ashyq arteriialyq tútik (AAT) diagnozy qoiylǵan. Dáriger bizge 2 ai boiy qabyldaityn dári jazyp, tapsyrys beretin jerdiń nómirin berdi. Men ol nómirge habarlasyp, «Terra Farm» JShS-ǵa WhatsApp arqyly dáriniń ataýyn jazyp jiberdim. Olar eseptep, 9 600 teńge bolatynyn aitty. Men salystyryp kórý úshin «Gipokrat» JShS-ǵa habarlasyp, baǵasyn surap edim, olar 2 270 teńge ekenin aitty. Bir dáriniń baǵasy eki dárihanada jer men kóktei. Ne úshin olai? Tipti, jeke menshik dárihanalar 20%-dan artyq qospaidy. Men tań qalyp otyrmyn!», - dep jazǵan áleýmettik jeli qoldanýshysy Facebook-tegi atalǵan topqa.
Nur-Sultan qalasy Taýarlar men qyzmetterdiń sapasy men qaýipsizdigin baqylaý departamentiniń baspasóz qyzmeti dáriniń baǵasyn qalai baqylaýǵa bolatynyn aitty.
«Bizdiń departamentke aryzdanǵan jaǵdaida shaǵym jasalǵan dárihanany habardar etýimiz kerek. Sodan soń 2 aptadan keiin baryp teksere alamyz. Biznesti tekserýge moratorii jariialanǵanyna bailanysty shaǵymǵa qatysty tekserý tártibi osyndai. Taǵy bir aita ketetin jait, internette jáne uialy telefondarda portal.dari.kz degen qosymsha bar. Ol jerde barlyq dári-dármektiń ataýy men qai dárihanada qansha teńgeden satylyp turǵany, eń kóp degende qansha teńgege satylatyny týraly málimet bar. Atalǵan keiipker shaǵymdanǵan dárihanaǵa baryp, osy qosymshany ashý arqyly dáriniń baǵasyn kórsetip, «Mine, myna jerde eń kóp degende osynsha teńgege satylatyny jazylǵan, Sizder nege birneshe ese kóp baǵaǵa satasyzdar?» dep suraýyna bolady», - dep jaýap berdi Nur-Sultan qalasy Taýarlar men qyzmetterdiń sapasy men qaýipsizdigin baqylaý departamentiniń baspasóz qyzmeti.
