Qazaqstanda meditsinalyq qyzmetkerlerdiń arasynda koronavirýs infektsiiasyn juqtyrý faktisi nelikten órship ketti? Bul suraqqa QR DSM Taýarlar men kórsetiletin qyzmetterdiń sapasy men qaýipsizdigin baqylaý komitetiniń tóraǵasy Liýdmila Biýrabekova jaýap berdi, dep habarlaidy QazAqparat.
«Qazaqstanda koronavirýsty juqtyrý jaǵdaiy nelikten meditsina salasynyń qyzmetkerleri arasynda órship barady? Osy máseleni Taýarlar men kórsetiletin qyzmetterdiń sapasy men qaýipsizdigin baqylaý komitetine qarasty departamentteri zerttegen bolatyn. Máselen bul rette alǵashqy jaǵdai Almaty qalasyndaǵy balalardyń infektsiialyq aýrýhanasynda tirkeldi. Sondaǵy aýmaqtyq departamenttiń málimetine sáikes onda meditsina qyzmetkerleri statsionarda táýlik boiy júrgen. Iaǵni dál sol kezde aýysymnan keiin dárigerdiń turatyn ári demalatyn oryny jasaqtalmaǵan. Osylaisha dárigerler amalsyz statsionarda qalýǵa májbúr bolǵan», - dedi Liýdmila Biýrabekova OKQ-da onlain rejimde ótken baspasóz máslihatynda.
Sonymen qatar dárigerlerdiń jumystan sharshaýy, jumystyń 10 saǵatqa sozylýy, kei jaǵdaida jeke saqtyq quralymen qamtylmaýy nemese ony durys paidalanbaý jaǵdailary da anyqtalǵan.
«Qaraǵandy oblysynda da jumys rejiminiń buzylý faktisi tirkeldi. Iaǵni dárigerler jumys ornynda táýlik boiy bolǵan. Ondaǵy dárigerlerdiń de keibiri jeke saqtyq quraldarymen jáne dezinfektsiialyq quralmen qamtamasyz etilmegen. Atyraý oblystyq aýrýhanasynda COVID-2019 aýrýy boiynsha kúdikti bolyp túsken aiaǵy aýyr áielge dárigerler laiyqty deńgeide abailap qaramaǵan. Meditsina qyzmetkerleri osylaisha ózin qorǵaý tártibin oryndamaǵan. Nur-Sultandaǵy koronavirýstyń oshaǵy sanalatyn úsh meditsinalyq uiymdaǵy (ondaǵy dárigerler koronavirýs juqtyrǵan patsientterdi emdeýge jumyldyrylmaǵan) dárigerler basqa jerde koronavirýs juqtyrǵan adamdarmen bailanysta bolǵan», - dedi ol.
Sonymen qatar Densaýlyq saqtaý ministriniń tapsyrmasymen dáriger-infektsionisttiń shaǵymy boiynsha «Merke» emhanasyna tekserý júrgizilgen.
«Shaǵym boiynsha túsken fakttardyń bári de rastaldy. Atalǵan tekseristiń qorytyndymsy boiynsha Jambyl oblysynyń basshylyǵy emhananyń basshysy men bas esepshisine qatysty shara qabyldady. Sol sekildi basqa óńirlerde de qaýipsizdik sharalary saqtalmaǵandyqtan, isterdi sot organdaryna jiberdik. Almatydaǵy departamenttiń tekserý qorytyndysymen sot organdaryna 6 jeke meditsinalyq uiymnyń litsenziiasyn toqtatý týraly shaǵym berildi», - dedi ol.
Onyń aitýynsha meditsinalyq qyzmetkerlerdiń arasynja virýs juqtyrýdyń basty sebepteri – meditsinaly uiym basshylary men jergilikti atqarýshy organdardyń personaldy qorǵaý sharalaryn oryndamaýy, atap aitqanda jeke qaýipsizdik quralymen, dezinfektsiialyq quralmen qamtamasyz etpeý, nusqaýlyqtardy durys júrgizbeý, nysandardyń tehnikalyq jai-kúii (taza jáne las aýmaq dep bólinbeýi), eńbek rejiminiń buzylýy, sondai-aq qaýipsizdik quraldaryn durys paidalanbaý (kiiý, sheshý).
«Karantin nysandarynda meditsinalyq qyzmetkerlerdiń demalý jaǵdailarynyń sharty memlekettik komissiianyń hattamasynda naqty kórsetilgen bolatyn. Alaida bul tapsyrma búkil aimaq oryndamai otyr. Tek úsh óńir – Aqtóbe, Jambyl jáne BQO oblystary meditsinalyq qyzmetker úshin osyndai jaǵdaidy jasaýda», - dedi ol.
