Foto:elements.envato.com
Densaýlyq saqtaý ministrligi meditsinalyq oqiǵa saldarynan zardap shekken qazaqstandyqtarǵa ótemaqy tólenetin zań jobasyn ázirledi. Ol úshin meditsina qyzmetkerleri qyzmetine mindetti saqtandyrý engizý usynyldy, - dep habarlaidy Tengrinews.kz.
Májiliste densaýlyq saqtaý ministri Ajar Ǵiniiat "Keibir zańnamalyq aktilerge densaýlyq saqtaý máseleleri boiynsha ózgerister men tolyqtyrýlar engizý týraly" zań jobasyn tanystyrdy.
"Emdelýshilerge keltirilgen ziiandy óteýge memleket kepildik bergen quqyqtaryn júzege asyrý úshin meditsina qyzmetkerleriniń kásibi jaýapkershiligin mindetti saqtandyrý júiesin kezeń kezeńimen engizý qajet", - dedi ministr.
Onyń aitýynsha, jyl saiyn elimizde meditsinalyq qyzmetkerlerge qatysty Qylmystyq kodekstiń 317-babynda kózdelgen qyzmettik mindetterin tiisinshe oryndamaǵany úshin 300-ge jýyq is qozǵalady. Qylmystyq ister ólim qaýpi bar hirýrg mamandaryna qatysty jii qozǵalady.
"Jábirlenýshilerdiń paidasyna keltirilgen moraldyq jáne materialdyq zalaldy óteýdiń jalpy somasy 40 million teńgeden asa soma bolady. Saqtandyrý tólemderi sot sheshimi boiynsha saqtandyrý polisi bolǵan jaǵdaida júzege asyrylady, qylmystyq jaýapkershilik tanylǵan jaǵdaida tólenbeidi.
Osylaisha, meditsinalyq oqiǵa bolǵan jaǵdaida meditsina qyzmetkeri jalaqysynyń deńgeii naýqastyń densaýlyǵyna keltirilgen ziiandy óz betimen óteýge jetpeidi", - dep túsindirdi Ǵiniiat.
Ministrlik josparyna sáikes, meditsinalyq uiymdardyń ózi 2023 jyldan bastap jeke saqtandyrý kompaniialarymen kelisimshart jasasady. 2025 jyldan bastap yntymaqtastyq negizinde saqtandyrýdy meditsinalyq uiymdar men meditsina qyzmetkerleri bólisedi. Saqtandyrý sharty bir jylǵa jasalady, onyń ishinde saqtandyrý kompaniiasy meditsinalyq oqiǵalar boiynsha barlyq tólemdi óteidi.
Ajar Ǵiniiat naýqastyń tańdaýy bolatynyn túsindirdi. Meditsinalyq uiymnyń sheshimimen jáne tólem mólsherimen kelispese, ol sotqa júgine alady. Sondai-aq, ol josparlanǵan ótemaqy kólemin de jariialady.
"Densaýlyq saqtaý salasynyń áleýmettik baǵdarlanýyn eskere otyryp, saqtandyrý júiesin engizýdiń bastapqy kezeńinde saqtandyrýshynyń saqtandyrý jaǵdaiy boiynsha jaýapkershiliginiń shekti kólemin "kólik quraldary ieleriniń AQJ mindetti saqtandyrý týraly" zańǵa uqsas anyqtaý usynylady. Patsienttiń ómirine nemese densaýlyǵyna keltirilgen ziian úshin:
- ólim jaǵdaiy – 1000 AEK (2022 jyly 3 million 180 myń teńge - esk.);
- birinshi toptaǵy múgedektikti anyqtaý – 800 AEK (2022 jyly 2 million 544 myń teńge - esk.);
- ekinshi top – 600 AEK (2022 jyly 1 million 908 myń teńge - esk.);
- úshinshi topqa – 500 AEK, "múgedek balaǵa" – 500 AEK (2022 jyly 1 million 590 myń teńge - esk.);
- dene jaraqaty nemese múgedektik anyqtalmaǵan ózge de ziian keltirý – naýqasty ambýlatorlyq nemese statsionarlyq emdeýge jumsalǵan naqty shyǵyndar mólsherinde – 300 AEK (2022 jyly 954 myń teńge - esk.)" – dep tolyqtyrdy Ǵiniiat.
