Foto: Astana qalasy ákimdigi
Astana qalasynyń Qoǵamdyq densaýlyq saqtaý departamenti elorda turǵyndaryn kóshege orynsyz shyqpaýdy surap, úndeý tastady, - dep habarlaidy "Ult aqparat".
"Astanadaǵy Qorǵaljyn tasjoly men Qosshyǵa qarai ótetin ainalma jol arasyndaǵy qýraǵan aǵashtyń janyp ketýine bailanysty tútin men órtengen iis baiqalyp jatyr. Osyǵan bailanysty qalalyq qoǵamdyq densaýlyq saqtaý basqarmasy qala turǵyndaryn orynsyz kóshege shyqpaýǵa shaqyrady. Páterlerde terezelerdi jaýyp, kóshede betperde kiip júrýdi eskertedi. Bul usynystar birinshi kezekte tynys alý joldary aýrýlary bar adamdarǵa qatysty", - delingen habarlamada.
Aita keteiik, aldyn ala aqparat boiynsha elorda mańyndaǵy órt aýmaǵy 15 gektarǵa jetti.
Órtti sóndirý úshin jeke quramnyń 140 adamy jáne 40-qa jýyq tehnika jumyldyrylǵan.
