Elordada sailaý strategiialary talqylanyp jatqanda, óńirlerde veterinariialyq stantsiialar, aiaqkiim fabrikalary men turmystyq qaldyqtardy suryptaý siiaqty kúndelikti máselelerge toly ómir jalǵasýda. Quryltai depýtattyǵyna kandidattardyń qai óńirlerge baryp, turǵyndarmen qandai taqyryptardy talqylaǵanyna sholý jasaimyz.
«Ádilet» partiiasy stýdenttermen, oqytýshylarmen, kásipkerlermen jáne kreativti indýstriia ókilderimen tikelei dialog júrgizý taktikasyn tańdady. Qostanai oblysynyń Borovskoe aýylynda kandidat Edil Hamza jergilikti turǵyndarmen kezdesip, óńir úshin ózekti máselelerdi talqylady. Al Batys Qazaqstan oblysynda turǵyndar, kásipkerler, shyǵarmashylyq sala ókilderi, jastar men eńbek ujymdarymen kezdesý ótti. Kezdesý barysynda óńirdiń áleýmettik-ekonomikalyq damý máseleleri qaraldy.
Jalpyulttyq sotsial-demokratiialyq partiia (JSDP) turmystyq qaldyqtardy bólek jinaý jáne qaita óńdeý máselelerin talqylady. Bul taqyryptar aýqymdy saiasi málimdemelerden góri qarapaiym kóringenimen, árbir turǵynnyń ómirine tikelei qatysty. Tanystyrylymǵa ekologter, múlik ieleri birlestikteriniń ókilderi men qala turǵyndary qatysty. Sonymen qatar Quryltai depýtattyǵyna kandidat Anargúl Ábenova jer úlesi ielerimen kezdesip, jer qatynastaryna qatysty máselelerdi talqylady.
«Baitaq» partiiasy ártúrli óńirlerde ekologiialyq uiymdar men kásiporyndar ókilderimen birqatar kezdesý ótkizip, tabiǵatty qorǵaý salasynyń sarapshy mamandary qatysqan talqylaý uiymdastyrdy. Kezdesýlerdiń kún tártibine qaraǵanda, partiia qorshaǵan ortany qorǵaý máselesin basty nazarda ustap otyr.
Qazaqstannyń Halyq partiiasy áleýmettik saiasat máselelerin kún tártibine shyǵardy. Astanada kandidattar Lázzat Aqtaeva men Nurjan Biiaqaev qalalyq jedel meditsinalyq járdem stantsiiasyna baryp, dárigerler men feldsherlermen kadr tapshylyǵy, eńbek jaǵdaiy jáne shuǵyl meditsinalyq kómekti uiymdastyrý máselesin talqylady. Kezdesý barysynda jedel járdem qyzmetiniń jumysy, kadrlyq qamtamasyz etý, meditsina qyzmetkerleriniń eńbek jaǵdaiy jáne shuǵyl meditsinalyq kómek kórsetý júiesi qamtyldy.
«Aýyl» partiiasynyń ókilderi partiia tóraǵasy Qairat Aitýǵanovtyń bastaýymen Soltústik Qazaqstan oblystyq veterinariia basqarmasynyń ujymymen kezdesti. Kezdesý barysynda veterinariialyq qyzmettiń jumysyna qatysty máseleler talqylanyp, salanyń qyzmetine qatysty ózekti másele kóterildi.
«Aq jol» demokratiialyq partiiasy óndiris oryndaryn aralaý baǵytyn tańdady. Tarazda partiia tóraǵasy Daniia Espaeva «TarazKojObýv» kásipornyna baryp, jumysshylarmen óndiris tsehynda júzdesti. Al Atyraýda kandidat Ermekqali Iýsýpov ITC WEST logistikalyq ortalyǵynda boldy. Eńbek ujymdarymen kezdesýler Jambyl, Atyraý, Ulytaý oblystarynda, Qostanai men Shymkentte de ótti. Partiia ókilderi elimizdiń ózge óńirlerinde de turǵyndarmen jáne eńbek ujymdarymen kezdesýlerin jalǵastyrdy. Sonymen qatar «Aq jol» kandidattary Respublica partiiasy ókilderiniń málimdemesine pikir bildirdi. Májilistiń burynǵy depýtaty Merýert Qazbekova eks-depýtat Oljas Kópbekovtiń depýtattyq saýaldarǵa qatysty málimdemesine óz kózqarasyn bildirdi.
Respublica partiiasy tóraǵasynyń orynbasary Janat Ysqaqov TMD halyqaralyq baiqaýshylar missiiasynyń ókilderimen kezdesti. Taraptar sailaý naýqanyna daiyndyqty, sailaýaldy shtabtyń jumysyn, úgit-nasihat júrgizý erekshelikterin, tsifrlyq platformalardy paidalanýdy, sondai-aq partiialyq tizimdi jasaý men kandidattardy irikteý máselelerin talqylady. Halyqaralyq baiqaýshylar missiiasynyń ókilderi óz kezeginde jumystyń qaǵidattary men ádisteri týraly aityp berdi. Túrkistanda partiia basshylyǵynyń, Quryltai depýtattyǵyna kandidattardyń jáne partiia jaqtastarynyń qatysýymen forým ótti. Forým barysynda áleýmettik-ekonomikalyq kún tártibi, zańnama jáne ózge de máseleler talqylanyp, partiia ókilderi qatysýshylardyń suraǵyna jaýap berdi. Sonymen qatar Respublica partiiasynyń tóraǵasy Aidarbek Qojanazarov Qazaqstannyń Halyq partiiasynyń burynǵy tóraǵasy Ermuhamet Ertisbaevtyń málimdemesine pikir bildirip, partiianyń bul máselege qatysty budan ary jariia pikirtalasqa qatyspaitynyn aitty.
Osylaisha, partiialar ózderiniń dástúrli baǵyttary boiynsha jumysyn jalǵastyryp jatyr. Biri ekologiia men áleýmettik sala máselelerine basymdyq berse, endi biri óndiris oryndary men óńirlerde halyqpen tikelei dialog ornatýǵa nazar aýdardy. Sonymen qatar sailaý naýqanynyń taǵy bir qyry – partiialardyń bir-birin synaýy, qarsy taraptyń málimdemelerine jaýap berýi jáne óz ustanymdarynyń ara-jigin aiqyndaýǵa umtylysy qatar órbip jatyr.
