Pavlodar oblystyq Politsiia departamentiniń basshysy Amantai Áýbákirov taksi júrgizýshisiniń dáriger qyzdy zorlaý isin tegeýdi jeke baqylaýyna alyp, mindetine salǵyrt qaraǵan politseiler jaýapkershilikke tartylatynyn aitty, dep habarlaidy "Ult aqparat".
Ravlodarnews.kz saitynyń jazýynsha, Pavlodarda qyzdy zorlaý jáne tonaý faktisi týraly aqparat buǵan deiin Facebook-tegi #Nemolchikz tobynyń paraqshasynda paida boldy. Jariialanymnyń avtory 2019 jylǵy 1 maýsymnan 2 maýsymǵa qaraǵan túni ápkesi men aǵasy keshke InDriver arqyly taksi shaqyrǵanyn jazǵan.
Bul rette, júrgizýshi qyzdyń aǵasyn birinshi jetkizip tastap, emhanada dáriger bolyp jumys isteitin ózin odan ári ákele jatqan. Biraq úiine jeter-jetpes jerde kóliktiń esikterin buǵattap, qyzdy zorlaǵan. Buǵan qosa, quny 280 myń teńge turatyn «Aifon-8» telefonyn alyp qoiyp, ózin mashinadan shyǵaryp jibergen.
Jábirlenýshi politsiiaǵa júgingennen keiin kúdiktiniń týystary onyń izine túsip, 100 myń teńge usynǵan jáne aryzyn qaityp alýdy suraǵan.
Istiń tergelýine qatysty Pavlodar oblystyq Politsiia departamentiniń basshysy Amantai Áýbákirov túsinik berdi. 1 qazan kúni dáriger qyz ben onyń qorǵaýshysy bas politseidiń jeke qabyldaýynda bolǵan.
«Is boiynsha qosymsha birqatar sot saraptamalary taǵaiyndaldy. Nátijeleri jaqyn arada daiyn bolady. Kúdikti M.-niń dálelderi tekseriledi jáne onyń qatysýymen tergeý áreketteri júrgiziledi. Onyń jeke basy men jasalǵan árekettiń aýyrlyǵyn eskere otyryp, qamaýda ustaýǵa bailanysty emes bultartpaý sharasy taǵaiyndaldy. Sonymen qatar, kúdikti M.-niń jábirlenýshige kelip, aryz alýdy suraǵan jaqyn týystary anyqtaldy. Qazirgi tańda olardyń qatysýymen tergeý áreketteri júrgizilip, zańdyq baǵa beriletin bolady», - dedi Amantai Áýbákirov.
Budan bólek, qyzmettik mindetterine salǵyrt qaraǵan politseilerdiń ústinen qyzmettik tergeý bastalǵan.
«Atalmysh is boiynsha tergeýdiń tómen sapasy jáne sózbuidaǵa salýǵa jol berilgeni úshin Ózindik qaýipsizdik basqarmasy oblystyq PD qyzmetkerlerine qatysty qyzmettik tergeýdi bastady. Onyń nátijeleri boiynsha sharalar qabyldanatyn bolady. 1 qazan kúni azamatsha S. qorǵaýshysymen birge oblystyq PD bastyǵynyń jeke qabyldaýynda boldy jáne tergeý barysy erekshe baqylaýǵa alyndy. Qazaqstan Respýblikasy QPK 201-babyna sáikes ózge aqparat tergeý múddesine sai taratylmaidy», - dedi PD basshysy.
