Senat tóraǵasy Dariǵa Nazarbaeva Batys Qazaqstan oblysyna jumys sapary barysynda «Zenit» keme jasaý zaýytynyń jumysymen tanysty. Bul týraly "Ult aqparat" Senattyń baspasóz qyzmetine silteme jasap habarlaidy.
Zaýyt basshylyǵymen jáne eńbekkerlermen áńgime kezinde Senat basshysy qorǵanys salasynyń múddesine jumys isteitin kásiporyndy damytýǵa qajetti normativtik-quqyqtyq baza jasalǵanyn, elimizde jyl basynda «Qorǵanys ónerkásibi jáne memlekettik qorǵanystyq tapsyrys týraly» jańa zań qabyldanǵanyn atap ótti.
«Úkimet qorǵanys maqsatyndaǵy ónim shyǵaratyn otandyq kásiporyndardy qoldaý boiynsha júieli jumys júrgizýi kerek. Bizge óz ónerkásibimizdi damytý jáne tapsyrystardy birinshi kezekte qazaqstandyq kásiporyndarǵa berý mańyzdy», - dep atap ótti D.Nazarbaeva.
Dariǵa Nazarbaeva sol kúni Oraldaǵy ulttyq mádeni ortalyqtardyń basshylarymen, Batys Qazaqstan oblysyndaǵy jastar men eriktiler uiymdarynyń ókilderimen kezdesti.
Dariǵa Nazarbaevanyń aitýynsha, Qazaqstan halqy Assambleiasy elimizdegi ultaralyq tatýlyq pen kelisimdi nyǵaitýdaǵy yqpaldy qoǵamdyq kúsh bolyp tabylady.
«Jyly shyraily kezdesýler men izgilikti sózderińiz úshin Sizderge alǵys aitamyn. Sizderdiń naqty isterge niettengen oń kózqarastaryńyz kóńilge qýanysh uialatady. Búginde Qazaqstan halqy Assambleiasy ulttyq mádeni ortalyqtardyń jumysyna jastardy belsendi túrde tartyp, jańa kóshbasshylardy ósirýi tiis. Ár ult jastarynyń mansaby men kásibi turǵyda ósýi úshin teń múmkindikter jasalýy tiis. Jastar elden kóship ketpeýi úshin áleýmettik liftilerdiń ashyq júiesi kerek», - dep atap ótti Senat Tóraǵasy.
Senat basshysy aimaqtaǵy buqaralyq aqparat quraldarynyń ókilderimen júzdesýde aqparat quraldary qazirgi álemde tap bolyp otyrǵan jańa qaýip-qaterler týraly aitty.
D.Nazarbaevanyń aitýynsha, dástúrli buqaralyq aqparat quraldary – teledidar, radio, gazet – halyqtyń 70 paiyzy úshin burynǵysha aqparattyń negizgi kózi ekenin statistika derekteri kórsetip otyr. Sonymen birge, ǵalamtor men mobildi qurylǵylar arqyly mediany tutyný ulǵaiyp barady. Bul úderister saralanyp, buqaralyq aqparat quraldary salasyn damytý jónindegi memlekettik strategiiada belgilenýi tiis. Senat basshysy Batys Qazaqstan oblysyndaǵy buqaralyq aqparat quraldarynyń ókilderin osy qujatty daiyndaýǵa jáne aqparat quraldary týraly zańnamaǵa túzetýler ázirleýge belsendi qatysýǵa shaqyrdy.
