Astanada Álemdik jáne dástúrli dinder liderleri sezi hatshylyǵynyń XVIII otyrysy bastaldy. Búgin Senat tóraǵasy Dariǵa Nazarbaeva hatshylyq tóraǵasy retinde otyrysty alǵash ret ótkizip otyr, dep habarlaidy Sputnik Qazaqstan.
"Táýelsizdik jyldarynda óńirlik qaýipsizdik pen turaqtylyqtyń tiregine ainalǵan eldiń basshysy Nursultan Nazarbaevtyń bastamasyn eń iri álemdik dinder men konfessiialardyń basshylary qoldady. Onyń konfessiiaaralyq ashyq dialog ótkizý ideiasyn sol sátte barsha álemnen qoldaý tapty. Sodan beri Qazaqstannyń Tuńǵysh Prezidentiniń strategiialyq salmaqty ári kóregen bastamasy óziniń ózektiligin joǵaltqan emes", - dep bastady sózin Nazarbaeva.
Onyń aitýynsha, jańa myńjyldyqtyń basynda iri konfessiiaaralyq ashyq dialog ótkizý naǵyz revoliýtsiialyq bastama boldy. Búginde osy shara iri konfessiia basshylarynyń dástúrli kezdesýine ainaldy.
"Álemdik jáne dástúrli dinder sezi jer betindegi bitimgershilik protsesine, adamdardy tózimdilik pen ózara syilastyq rýhynda tárbieleýge ólsheýsiz úles qosty dep sanaimyn. Sezdiń alǵashqy deklaratsiiasynda qatysýshylar dini erekshelikterdi óshpendilik pen alaýyzdyq quraly retinde paidalanýǵa jol bermeýge barynsha kúsh salyp, adamzatty dinder men mádenietterdiń jahandyq qaqtyǵysynan qorǵaýǵa daiyn ekenin, sondai-aq, shyndyq, ádildik pen súiispenshilik siiaqty qundylyqtardy kez kelgen ýaǵyzdyń negizgi maqsaty retinde ilgeriletýge múdelli ekenin málimdegen", - dep atap kórsetti Nazarbaeva.
Osy oraida hatshylyq jetekshisi Elbasy Nursultan Nazarbaevtyń Siriia máselesin Nur-Sultan qalasynda retteý bastamasyn da eske saldy. Onyń aitýynsha, osy bastamadan keiin óńirdegi jaǵdai jaqsara bastady.
"Qurmetti qonaqtar, bizdiń aldymyzda 202 jylǵa josparlanǵan Álemdik jáne dástúrli dinder liderleriniń VIII seziniń kún tártibindegi negizgi taqyryptardy tujyrymdaý jáne ony ótkizýdi uiymdastyrý boiynsha jaýapty jumys kútip tur", - dedi Nazarbaeva.
Otyrys kezinde san alýan konfessiia ókilderi hatshylyqtyń burynǵy tóraǵasy Qasym-Jomart Toqaevtyń eńbegin erekshe atap ótti. Dariǵa Nazarbaeva onyń buǵan deiin atqarǵan jumysyna joǵara baǵa berdi.
Aita keteiik, buǵan deiin Álemdik jáne dástúrli dinder liderleri seziniń hatshylyǵyn senattyń eks-tóraǵasy Qasym-Jomart Toqaev basqardy. Osy qyzmetke Dariǵa Nazarbaeva kelgennen keiin oǵan hatshylyqty basqarý quzireti de tabystaldy.
