Parlament Senatynyń Tóraǵasy Dariǵa Nazarbaeva Singapýrdyń aǵa ministri – ulttyq qaýipsizdik máseleleri jónindegi úilestirýshi ministr Teo Chi Hindi qabyldady.
Bul týraly QR Parlamenti Senatynyń baspasóz qyzmeti habarlady.
Senat basshysy Qazaqstan táýelsizdiktiń alǵashqy jyldarynda elimizdiń Tuńǵysh Prezidenti – Elbasy N.Á.Nazarbaev jáne Singapýrdyń Birinshi Premer-ministri Li Kýan Iu negizin qalaǵan dostyq qatynasty joǵary baǵalaitynyn atap ótti.
«Biz saýda-ekonomikalyq jáne mádeni-gýmanitarlyq bailanystardy nyǵaitýǵa, Qazaqstanǵa Singapýr investitsiiasyn tartýǵa múddelimiz», - dedi Parlament joǵarǵy palatasynyń basshysy.
Senat Tóraǵasy osy oraida «Astana» halyqaralyq qarjy ortalyǵynyń qurylýyna bailanysty biznes úshin tartymdy jaǵdai qalyptasyp otyrǵany týraly aityp berdi.
«Singapýrlyq kompaniialar Ortalyq Aziia jáne EAEO elderimen yntymaqtastyqta «Astana» qarjy ortalyǵynyń áleýetin paidalanýǵa múmkindikteri bar. Bul halqy 160 million adamnan asatyn qarqyndy damyp kele jatqan keleshegi bar aýdan», - dedi D.Nazarbaeva.
Teo Chi Hin EAEO men Singapýr arasyndaǵy erkin saýda ainalymy jónindegi kelisimdi ratifikatsiialaýdyń mańyzyn atap ótti. Kelisim Ońtústik-shyǵys Aziia elderiniń assotsiatsiiasy men EAEO elderi arasyndaǵy yntymaqtastyqqa jańa serpin beredi», - dedi Singapýrdyń aǵa ministri.
Parlamenttiń joǵarǵy palata basshysy Qazaqstannyń kólik-logistika áleýetin damytý josparlary týraly habardar etip, Singapýr qazaqstandyq kompaniialardyń Ońtústik-Shyǵys naryqqa shyǵýynyń qaqpasy bola alatynyn atap ótti.
Senat Tóraǵasy Qazaqstannyń investitsiialyq tartymdylyǵyn nyǵaitýǵa múmkindik beretin kólik-logistikalyq habta mańyzdy ról atqaratyn «Bir beldeý, bir jol» Qytai megajobasynyń áleýetin atap ótti.
Taraptar parlamentaralyq yntymaqtastyqty nyǵaitýǵa ýaǵdalasty. Dariǵa Nazarbaeva elimizben, onyń kórikti jerlerimen jáne turǵyndarymen jaqsy tanysý maqsatynda singapýrlyq depýtattardy týrister retinde kelýge shaqyrdy. Tóraǵa Singapýr men Qazaqstan arasynda tikelei áýe baǵytyn ashýdy usyndy.
Teo Chi Hin Singapýr tsifrlandyrý jáne memlekettik basqarý salasyndaǵy tájiribesimen bólisýge daiyn ekenin atap ótti. Ol sondai-aq Qazaqstannyń Tuńǵysh Prezidenti N.Á.Nazarbaevtyń táýelsiz Qazaqstannyń damýyna zor úles qosqanyn jáne Singapýrdyń jaqyn dosy ekenin atap ótti. Aǵa ministr Elbasyny Singapýrǵa saparmen kelýge shaqyrdy.
