Senat tóraǵasy Dariǵa Nazarbaeva joǵary palatanyń 2020 jyldaǵy alǵashqy otyrysynda birqatar mańyzdy usynys aitty, dep habarlaidy Sputnik Qazaqstan.
Nazarbaeva jyl basynda depýtattar óńirlerde sapar shegip, halyqtyń jaǵdaiyn, zańdar men memlekettik baǵdarlamalardyń júzege asý deńgeiin kórip, jergilikti ókildi organdardyń qyzmetimen tanysqanyn atap ótti.
"Elimizdiń túpkir-túpkirinde qazaqstandyqtardy alańdatyp otyrǵan jergilikti jerlerdegi sheshimi tabylmaǵan máselelerdi kózbe-kóz kórip, sheshimin tabýdy qajet etetin suraqtardy tyńdaldy. Endi olardy sheshý joldaryn qarastyrý qajet. Bul máselelerdiń kópshiligi depýtattyq saýaldar men suraqtarǵa negiz bolady, parlamenttik tyńdaýlarda, úkimet saǵattarynda jáne túrli kezdesýlerde kóterilip, usynymdarǵa engizilip, komitetterdiń jumys josparlarynda eskeriledi. Úkimetke depýtattyq saýal retinde jetkizip qana qoimai, oryndalýyn qadaǵalaý kerek, bul úshin depýtatqa berilgen múmkindikterdi tolyǵymen paidalanyńyzdar.", - dedi Nazarbaeva senattyń jalpy otyrysynda.
Onyń aitýynsha, biyl 80-ge jýyq is-shara ótkizýdi josparlanyp otyr. Aýyl sharýashylyǵy salasynyń problemalaryn kásibi túrde keńinen talqylaý úshin senat janynan Agroónerkásip kesheni jónindegi keńes qurý kózdelýde.
"Jaqynda úkimet zań jobalaý jumystarynyń osy jylǵa arnalǵan josparyn bekitti. 2020 jylǵy jospar jobasyna mańyzdy máselelerdi sheshýge, tuńǵysh prezident–Elbasy men memleket basshysynyń tapsyrmalaryn oryndaýǵa baǵyttalǵan 17 zań jobasy engizilgen. Osyǵan bailanysty, komitetter aldyn ala zań jobasyn ázirleýshilermen zańnamalyq jumystardy úilestirý qajet. Biz osy zańnamalyq qyzmet pen birge halyqty alańdatatyn ózekti máseleler boiynsha úkimetke naqty usynystar berip, tiisti zańdarǵa túzetýler engizýimiz kerek", - dedi spiker.
Sonymen qatar, Nazarbaeva quqyq qorǵaý organdarynyń nemese arnaýly memlekettik organ qyzmetkerleriniń arandatýshylyq áreketteri úshin jaýapkershilikti kúsheitý kerek ekenin aitty. Osy arqyly azamattardyń quqyǵyn qorǵaýdyń kepildikterin arttyrýdy usyndy.
Sondai-aq, usynystardyń arasynda:
shynaiy dálelderdiń jetkilikti jiyntyǵymen rastalmaǵan málimettermen qylmystyq jaýaptylyqqa tartýǵa, tek kýálik etý negizinde jaýapkershilikke tartý men sottaýǵa tyiym salý;
ákimshilik iýstitsiiany engizý, zańnamadaǵy barlyq túsiniksiz qarama-qaishylyqtardy azamattar men biznestiń paidasyna túsindirýdi qamtamasyz etý, olarǵa memlekettik organdarmen ózara qarym-qatynasqa teń jaǵdai jasaý;
jergilikti mańyzy bar áleýmettik-ekonomikalyq mindetterdi sheshýde aýdandyq, qalalyq jáne aýyldyq deńgeidegi biliktiń derbestigi men jaýapkershiligin keńeitý de bar.
"Biz óz tarapymyzdan zań qabyldaý qyzmetine jaýapkershilikpen qarap, der kezinde oryndaýǵa mindettimiz", - dep túiindedi sózin Nazarbaeva.
