Mektep óz aqshasynyń biraz bóligin ózi tabýy kerek. Almatydaǵy Muqaǵali Maqataev atyndaǵy mekteptiń muǵalimderimen kezdesken senat depýtaty Dariǵa Nazarbaeva osylai málimdedi, dep jazady Sputnik.
Joldaýdy ustazdarǵa jan-jaqty túsindirýge kelgen senator bilim ordasyndaǵy ashana, sport zal jáne oiyn alańdaryn jalǵa berýdi usyndy.
Dariǵa Nursultanqyzy sabaq aiaqtalyp, barlyq oqýshyny úige jibergennen keiin mektepten qosymsha tabys tabý kerektigin jetkizdi. Al túsken paida muǵalimderdiń jalaqysyna qosylýy tiis deidi senator.
Sondai-aq, bilim oshaǵynyń arnaiy qonaǵy bolǵan Dariǵa Nazarbaeva ustazdardyń kókeiinde júrgen suraqtarǵa jaýap berdi, dep habarlady KTK.
"Aýyldar men kei óńirlerde mektep ashanasynda dastarqan jaiyp, dúbirletip toi jasaidy. Endi osy toidyń aqysyn resmi túrde mektep biýdjetine aýdarsaq deimin. Meniń aityp otyrǵandarym - Bilim berý baǵdarlamasynda qarastyrylǵan", — dedi senat depýtaty Dariǵa Nazarbaeva.
