QR Parlamenti Senatynyń tóraǵasy, Álemdik jáne dástúrli dinder liderleri sezi Hatshylyǵynyń basshysy Dariǵa Nazarbaeva Máskeý jáne Búkil Reseidiń qasietti Patriarhy Kirillmen kezdesti, dep habarlaidy "Ult aqparat".
Kezdesý Qazaqstan Parlamenti Senaty delegatsiiasynyń Reseige resmi sapary aiasynda ótti.
Palatanyń baspasóz qyzmetinen málim etkendei, Dariǵa Nazarbaeva kezdesý barysynda jyly shyraily qabyldaýlar úshin Patriarhqa alǵys aitty. Sondai-aq Qazaqstan Respýblikasy men Máskeý Patriarhaty arasynda ózara syndarly is-qimyl qalyptasyp, senimdi qarym-qatynas ornaǵanyn atap ótti.
«Álemdik jáne dástúrli dinder liderleriniń IV sezine sizdiń qatysýyńyz forým jumysyna baǵa jetpes úles qosty jáne onyń mazmunyn aitarlyqtai baiyta tústi. Bizdiń yntymaqtastyǵymyz ben ózara qarym-qatynasymyz aldaǵy ýaqytta da elderimiz arasyndaǵy beibitshilik pen kelisimdi nyǵaitýǵa yqpal etedi dep úmittenemiz. Sizdi 2021 jyldyń maýsym aiynda ótetin kelesi forýmǵa qurmetti qonaq retinde qatysady dep úmittenemiz», - dedi Senat spikeri.
Patriarh Kirill óz kezeginde Dariǵa Nazarbaevaǵa forýmǵa shaqyrǵany úshin alǵysyn bildirdi jáne qoǵamdar, dinder men mádenietter arasynda syndarly únqatysý ornatýdaǵy, dinaralyq tózimdilikti, izgi niet pen ózara túsinistik qalyptastyrýdaǵy dini ierarhtar seziniń mańyzdy ekenin atap ótti.
«Qazaqstan – qasietti meken. Biz elimizdiń jáne ózara qarym-qatynasymyzdyń oń damýyna óte qýanyshtymyz. Sezd álem qaýymdastyǵyn tolǵandyratyn mańyzdy jáne naqty máseleler sheshiletin ashyq alań. Bul rette Tuńǵysh Prezident N. Nazarbaevtyń róli men eńbegi óte zor. Biz barlyq baǵyttar boiynsha qoldaý men tyǵyz yntymaqtastyqqa, onyń ishinde konfessiiaaralyq jáne órkenietaralyq dialogty damytý jónindegi N.Nazarbaev ortalyǵymen bailanysty nyǵaitýǵa yqylastymyz», - dep qorytyndylady Patriarh Kirill.
