Senattyń jalpy otyrysynda spiker Dariǵa Nazarbaeva úkimettiń nazaryn búgingi kúni qoǵamdy asa tolǵandyryp otyrǵan birneshe ekologiialyq máselege aýdardy, dep habarlaidy Sputnik Qazaqstan tilshisi.
Joǵarǵy palata tóraiymy ótken jyldyń sońynda Jaiyq ózeninde balyqtardyń jappai qyrylýyna toqtaldy.
"Bul tótenshe jaǵdaidyń mán-jaiyn anyqtaý úshin arnaiy vedomstvoaralyq komissiia qurylyp, tekserý jumystary júrgizilip jatyr. Qylmystyq ister qozǵaldy. Degenmen balyqtardyń jappai qyrylýynyń naqty sebepterin jáne qorshaǵan ortaǵa keltirilgen zalaldy anyqtap, osy tótenshe jaǵdaidy qalypqa keltirý boiynsha júrgizilip jatqan jumystar jóninde jurtshylyqty keńinen ári ashyq túrde habardar etýge airyqsha mán berilýi qajet", - dedi ol.
Sondai-aq, 13 naýryzda Mańǵystaý oblysyndaǵy Qalamqas ken ornynan shyqqan órt te Nazarbaevanyń nazarynan tys qalmady. Aitýynsha, ekologiialyq máselelerge jaýapty memlekettik organdar qorshaǵan ortaǵa jáne turǵyndarǵa eshqandai ziian kelmeidi dep sendirse de, apatty jaǵdaiǵa naqty baǵa berilýi tiis.
"Aýanyń, sýdyń, topyraqtyń sapasyna kúndelikti tekseris júrgizý kerek. Bul másele memleket basshysynyń jeke baqylaýynda. Sondyqtan osy ekologiialyq máselelelerdi eńserý boiynsha jedel sharalar qabyldaý qajettigine úkimettiń nazaryn aýdaramyn", - dedi Nazarbaeva.
Senat spikeri qajet bolǵan jaǵdaida, osy salaǵa qatysty zańnamaǵa tiisti túzetýler engizý jumystaryn qolǵa alǵan jón dep sanaidy.
