Parlament Senatynyń tóraǵasy, Qazaqstan Respýblikasynyń Tuńǵysh Prezidenti qorynyń direktory Dariǵa Nazarbaeva Nur-Sultanda ótip jatqan Qaterli isikpen kúres kóshbasshylarynyń dúniejúzilik sammiti aiasynda birqatar kezdesýler ótkizdi, dep habarlaidy QazAqparat joǵary palatanyń baspasóz qyzmetine silteme jasap.
Joǵarǵy palata basshysy Iordaniia Hashimit Koroldiginiń patshaiymy, Qaterli isikti halyqaralyq baqylaý odaǵynyń prezidenti Dina Miredpen kezdesti. Taraptar Tuńǵysh Prezident Qorynyń jáne Korol Hýseinniń Obyrmen kúres qorymen yntymaqtastyq múmkindikterin talqylady.
«Tuńǵysh Prezident Qory densaýlyq saqtaý jáne jastardyń ǵylymi zertteýlerimen birge túrli baǵyttardaǵy jobalardy qarjylandyrady. Qordyń direktory retinde bizdiń uiymdardyń yntymaqtastyq múmkindikterin qarastyrýdy usynamyn. Biz onkologiia máselelerin zertteý salasyndaǵy jumysymyzdy kúsheitýge yqylastymyz», - dedi Dariǵa Nazarbaeva.
Sondai-aq Senaty tóraǵasy sammit aiasynda Túrik Respýblikasynyń birinshi hanymy Emine Erdoǵanmen júzdesti.
Dariǵa Nazarbaeva ulttyq jáne álemdik aýqymdaǵy onkologiialyq syrqattardy zertteý, diagnoz jasaý jáne emdeýdiń mańyzdylyǵyn atap óte kelip, sharaǵa qatysqany úshin alǵysyn bildirdi.
Emine Erdoǵan óz kezeginde sammittiń uiymdastyrý deńgeiin joǵary baǵalap, densaýlyq saqtaý salasyndaǵy ekijaqty yntymaqtastyqty qalyptastyrýdy usyndy.
«Qazaqstan men Túrkiiany dostyq jáne baýyrlastyq qarym-qatynastar ǵana emes, áriptestik qatynastar da bailanystyrady. Bizdiń elderimiz kóptegen salalar boiynsha nátijeli yntymaqtasyp keledi. Sondyqtan sammittiń qorytyndysy boiynsha meditsina salasyndaǵy yntymaqtastyq pen ózara tiimdi bailanystardyń nyǵaiatynyna senimdimin», - dep atap ótti Túrkiia Respýblikasynyń birinshi hanymy Emine Erdoǵan.
Dariǵa Nazarbaevanyń Býrkina-Fasonyń birinshi hanymy Adjovi Sika Kaboremen kezdesýi de Qaterli isikpen kúres kóshbasshylarynyń dúniejúzilik sammiti aiasynda boldy.
Senat Tóraǵasy júzdesý barysynda Qazaqstanda onkologiialyq aýrýlarmen kúres boiynsha qabyldanyp jatqan sharalar týraly málim etti. D. Nazarbaevanyń aitýynsha, Elbasynyń tapsyrmasy boiynsha 2018-2022 jyldarǵa arnalǵan joǵary tehnologiialyq meditsinalyq qyzmetterge qoljetimdilikti ulǵaitý, diagnostika men emdeýdiń innovatsiialyq ádisterin engizý, kadrlyq resýrstardy damytý, onkologiia salasyndaǵy irgeli jáne qoldanbaly ǵylymi zertteýlerdiń keshendi jospary bekitilgen bolatyn.
Adjovi Sika Kabore óz kezeginde azamattardyń densaýlyǵyn saqtaý boiynsha birlesken jumystyń mańyzdylyǵyn atap ótti. Birinshi hanym onkologiialyq aýrýlarǵa qarsy kúres salasyndaǵy Qazaqstannyń tájiribesin úirenýge ázirlikterin bildirdi.
