Dariǵa Nazarbaeva sársenbi kúni májilistiń jalpy otyrysyna qatyspady.
"Depýtat áli de jalaqysy saqtalmaityn eńbek demalysynda", - dep habarlady Sputnik Qazaqstan tilshisine májilistiń baspasóz qyzmeti.
Budan buryn Ekonomikalyq reforma jáne óńirlik damý komitetiniń múshesi koronavirýspen aýyrǵandyqtan, qańtar aiynyń sońyna deiin jalaqysy saqtalmaityn demalysta bolatyny habarlandy. Ol syrqattan keiin ońalý kezeńinen ótip jatyr delingen edi.
Qazaqstannyń tuńǵysh prezidenti Nursultan Nazarbaevtyń úlken qyzy Dariǵa Nazarbaeva jyl basynan beri Parlamentke kelmedi.
Ol Prezident jańa Premer-ministrdi tanystyrǵan kezde de, Nurlan Nyǵmatýlinniń ornyna Májilistiń jańa spikeri Erlan Qoshanov sailanǵanda da bolmady.
Májilistiń jetinshi shaqyrylymynda Nazarbaeva Ekonomikalyq reforma jáne óńirlik damý komitetiniń múshesi boldy. Komitet basshysy Albert Raý Sputnik Qazaqstanǵa bergen suhbatynda buǵan deiin Dariǵa Nazarbaeva eńbek tártibin buzbaǵanyn jáne tek naqty sebeptermen ǵana jumysta bolmaǵanyn aitty.
Al, Elbasy qyzynyń basqa áriptesteri Nazarbaevanyń depýtattyq mandattan bas tartatyn ýaqyty keldi degen pikir bildirdi.
