Politsiia qyzmetkeri Daniiar Meiirhanǵa qatysty qylmystyq is toqtatyldy. Bul týraly Meiirhannyń advokaty Shymyrbai Aǵabekov málimdedi, - dep habarlaidy Tengrinews.kz agenttigi.
Aita keteiik, biyl mamyrda Túlkibas aýdany politsiiasynyń basshysy Daniiar Meiirhannyń qyzmetinen ýaqytsha bosatylǵany belgili bolǵan. Oǵan asa iri kólemdegi alaiaqtyq (QR QK 190-baby, 4-bóligi, 2-tarmaǵy) boiynsha is qozǵaldy. Keiin ol 40 million teńge kepilmen bosatyldy.
Advokat Shymyrbai Aǵabekovtiń aitýynsha, onyń qorǵaýyndaǵy azamatqa qatysty qylmystyq is qylmys quramynyń joqtyǵyna bailanysty toqtaǵan.
"Qylmys quramynyń bolmaýyna bailanysty qylmystyq is tolyǵymen toqtatyldy. Iaǵni, ol eshqandai zańǵa qaishy áreket jasamaǵan. Bastapqyda bul isti qalalyq politsiia basqarmasynyń ishki qaýipsizdik basqarmasy (OQB) tergegen. Odan keiin is Sybailas jemqorlyqqa qarsy qyzmettiń qaraýyna berildi. Sybailas jemqorlyqqa qarsy qyzmet biraz ýaqyt tergep, keiin toqtatý týraly túpkilikti sheshim qabyldady. Qala prokýrory bul sheshimmen kelisti. Ol tolyq aqtaldy", - dedi zańger Shymyrbai Aǵabekov.
Daniiar Meiirhan 1981 jyly týǵan, ishki ister organdarynda 2003 jyldan beri qyzmet etip keledi.
2020 jyldyń naýryzynan beri Túlkibas aýdandyq ishki ister basqarmasynyń bastyǵy. Buǵan deiin ol Túrkistan qalalyq IIB bastyǵy qyzmetin atqarǵan.
