QR Premer-Ministriniń orynbasary Berdibek Saparbaev basqarǵan úkimettik jumys tobynyń múshesi QR Aqparat jáne qoǵamdyq damý vitse-ministri Daniiar Esin Syr óńiriniń jastarymen kezdesti, dep habarlaidy "Ult aqparat".
B.Saparbaevtyń tapsyrmasyna sáikes, júzdesýde Jastar jylyn atap ótýdiń Úkimet bekitken Jol kartasyna engen baǵdarlamalar men tapsyrmalardyń oryndalý barysy talqylandy. Sondai-aq vitse-ministr jumys sapary barysynda áleýmettik tapsyrys arqyly oblysta birinshi ret júzege asyrylyp jatqan «Kyzylorda business hub» jobasyna qatysýshylardyń joba jasaý sátine kýá boldy. «Kyzylorda business hub» - jastardyń startap jobalaryn investor aldynda qorǵaýǵa úiretýge, bizneske baýlýǵa baǵyttalǵan.
Maqsaty - jastardyń ideialaryn bizneske ainaldyrý arqyly tabys tabýǵa, investorlarmen saýatty qarym-qatynas ornatýǵa, óz jobasynyń múmkindigin jariia ete alatyndai jaǵdaiǵa jetkizip, ózin jáne jobasyn investorlarǵa ótkize alatyndai jaýapkershilikke úiretý.
D.Esin jastar startaptarynyń baǵyttarymen tanysyp, óz tarapynan usynystaryn bildirdi. Jas startaperlermen kezdesý barysynda buǵan deiin Boeing 757 bazasynda jańa ushaqtyń tehnikalyq jáne dizainerlik kelbetin jasaqtaǵan Evgenii Demidenko kelesi jobasyn tanystyrdy. Evgenii vitse-ministrge YouTube beinehostingine uqsaityn, biraq múmkindigi odan joǵary bolatyn qazaqstandyq nusqanyń jobasyn iske qosý boiynsha jumystar júrgizip, investor izdestirip jatqanyn baiandady. Budan bólek, Aqparat jáne qoǵamdyq damý ministriniń orynbasary Jastar jyly aiasynda barlyq kommýnikatsiiamen jabdyqtalǵan Qyzylorda jastary úshin jasaqtalǵan oblystyq Jastar ortalyǵymen tanysty. D. Esin 4 myń sharshy metr aýmaqty quraityn zamanaýi ortalyq jumysymen tanysa otyryp, aimaqta jastar úshin qabyldanǵan sharalarǵa oń baǵa berdi. Ortalyq jumysyn qaita jasaqtaý Jastar jylynda jastarǵa jasalǵan úlken qoldaý ekendigin atap ótti. Jasalǵan qoldaýdy tiimdi ári maqsatty paidalanyp, jastardy jetistikke jetýge shaqyrdy. Jastar ortalyǵynda jastar úshin óz-ózine qyzmet kórsetý, keńes berý, kitaphana, meditsina qyzmetkeri, psiholog, anti-kafe, 330 oryndyq kópfýnktsiialy zal, kovorking jáne fitnes zaldarmen qatar, arnaiy IT-park jumysy uiymdastyrylǵan. Ortalyq túngi mezgilde de jumys isteidi.
Sonymen qatar vi-ministr sol jaǵalaýda ornalasqan Rýhani jańǵyrý ortalyǵynyń qyzmetimen tanysty. Qalalyq mýzei ornalasqan jańa ǵimarattaǵy Rýhani jańǵyrý ortalyǵynyń jumysyna oń baǵa berildi.
Oblysqa sapar Jalaǵash aýdanynda ótken kezdesýmen qorytyndylandy. Aýdanda Jastar jyly aiasynda qaita uiymdastyrylǵan Jastar ortalyǵymen tanysyp, jastarmen kezdesti. Usynys-pikirlerin tyńdady. Jastar ortalyǵyn qaita jańǵyrtý arqyly aýdan jastary bas qosatyn orynnyń paida bolǵanyna, olardyń ýaqytyn tiimdi uiymdastyrýǵa yqpal etkendigine kóz jetkizdi.
Aýdan ákimdigi Jastar jylyna orai biýdjetten 5 mln teńge bólip, jastarǵa arnalǵan ortalyqty zamanaýi úlgide jańǵyrtyp bergen. Keleshek urpaqpen kezdesý barysynda Jastar jylynyń Jol kartasy aiasynda júzege asyrylǵan jáne búginde barlyq óńirlerde naqty jumys jasaityn, turaqty áleýmettik baǵdarlanǵan biznes jobalardy iske qosýdy, aýyl jastarynyń ekonomikalyq jáne áleýmettik liftilerge qol jetkizýin arttyrýdy maqsat tutqan «Zeren-2019» jastarǵa bilim berý respýblikalyq jazǵy lageriniń maqsatty júzege asyrylǵanyna kóz jetkizdi. Sebebi, lagerge qatysýshy bir ǵana Jalaǵash aýdanynyń jastary jalpy alǵanda 3,5 mln teńgege sertifikattardyń iesi atanǵan. Qorǵaǵan jobalaryn aýdan jastary kóktemgi mezgilden bastap júzege asyrýǵa daiyn ekendikterin bildirdi. Daniiar Esin sonymen qatar, aýdanda birqatar turǵyndarmen kezdesip, Memleket basshysy Q. Toqaevtyń Joldaýda júktegen mindetterin oryndaý barysymen tanystyrdy.
