Májilistiń jalpy otyrysynda depýtat Daniia Espaeva memlekettik meditsinalyq nysandardy arzanǵa satý faktileri jaiynda aitty, dep habarlaidy QazAqparat.
«Aq jol» fraktsiiasy depýtattyq saýaldarda densaýlyq saqtaý júiesindegi jekeshelendirýdi birneshe ret synǵa aldy. Biz klinikalardy tómen baǵamen satýǵa nemese jańa ieler obekt úshin memlekettiń ózinen kepildendirilgen tólemder esebinen eseptesip, olardy keiinnen satyp alý arqyly senimdi basqarýǵa berýge qarsy boldyq. Mundai format sybailas jemqorlyq táýekelderiniń joǵary dárejesin jáne is júzinde áleýmettik nysandardy «qajetti adamdarǵa» taratýdy kózdeidi», - dedi D. Espaeva QR Premer-Ministriniń orynbasary Eraly Toǵjanovtyń atyna joldaǵan saýalynda.
Onyń aitýynsha, 2017 jyldan bastap 5 depýtattyq saýal joldanǵan, onda naqty mysaldar keltirildi. Atap aitqanda, bul Almaty oblysyndaǵy Talǵar aýdandyq aýrýhanasyna, Pavlodar oblystyq diagnostikalyq ortalyǵyna qatysty boldy. Mysaly, aýdany 7 000 sharshy metrden asatyn jáne barlyq jabdyqtary bar atalǵan ortalyq sharshy metrine 44 myń teńge baǵamen satyldy.
«Almaty qalasyndaǵy balalar stomatologiialyq klinikasy qalalyq qoǵamdyq densaýlyq basqarmasy basshysynyń aǵasyna satyldy. Klinikanyń esep shotynda 170 mln teńge bola tura jáne jyl saiynǵy biýdjettik qarjylandyrý 260 mln teńgeni qurasa da, alǵashqy jarna 92 mln teńgeni qurady. Munyń bárin jekeshelendirý dep ataýǵa bolmaidy, bul taza «jaýlaý». 2017-2020 jyldary barlyǵy 124 klinikany jekeshelendirý josparlanǵan bolatyn. Memleket nemese qoǵam budan qandai paida tapty – bul biz úshin de qupiia. Jekeshelendirýdiń 2021-2025 jyldarǵa arnalǵan Keshendi josparyna sáikes, taǵy 700 memlekettik kásiporyn jekeshelendirýge jatady, olardyń ishinde meditsinalyq obektiler de bar», - dedi depýtat.
Onyń sózine qaraǵanda, 2021 jylǵy 12 qazandaǵy «Deni saý ult» ulttyq jobasy aiasynda memlekettik-jekeshelik áriptestik (MJÁ) tetigi boiynsha 20 iri kópbeiindi aýrýhana salý kózdelgen.
«Keshe sybailas jemqorlyqqa qarsy is-qimyl keńesinde Prezident memlekettik-jekeshelik salasynda sybailas jemqorlyqqa qarsy baqylaý qajettigin atap ótti. Ony júzege asyrýǵa barlyq negiz bar. «Qazaqstandyq MJÁ ortalyǵy» saityna sáikes josparlanǵan meditsinalyq nysandardyń jalpy quny shamamen 3 trln teńgeni quraidy. (2 trln. 950 mlrd. teńge). Eger memlekettik klinikalar eń kóp degende 300-500 mln teńgege satylsa jáne sirek jaǵdailarda – 1-1,5 mlrd teńgege satylsa, al, ádette, senimgerlikpen basqarý túrimen «syiǵa tartylsa», onda olardyń ornyna jańa klinikalarǵa biýdjetten júzdegen milliard teńge jumsalady», - dedi D. Espaeva.
Máselen, Túrkistan qalasyndaǵy kópbeiindi aýrýhananyń operatsiialyq shyǵyndaryn, investordyń syiaqysyn jáne kreditter boiynsha paiyzyn eskere otyryp, 570 orynnyń investitsiialyq shyǵyndary 480 mlrd teńgeni quraidy. «Astana meditsina ýniversiteti» KEAQ janyndaǵy 800 oryndyq Birikken ýniversitet aýrýhanasyn salýǵa jáne paidalanýǵa beriletin tólemder 900 mlrd teńgege deiin jetedi.
Joǵaryda aitylǵandarǵa bailanysty «Aq jol» depýtattyq fraktsiiasy kelesilerdi suraidy:
1) Jekeshelendirilgennen nemese senimgerlik basqarýǵa berilgennen keiin, bul mekemeler memleketten qansha qarajat alǵanyn habarlaý.
2) MJÁ aiasynda jańa meditsinalyq nysandar boiynsha qurylysqa, qyzmet kórsetýge, basqarýǵa, operatsiialyq shyǵyndarǵa jáne paiyzdardy tóleýge qansha memlekettik qarajat josparlanǵanyn habarlaý.
3) Qoǵamǵa qazirgi klinikalardy tómen baǵada berýdiń jáne jańa nysandardy trilliondap qarjylandyrýdyń mánin, osy shemalardyń túpki benefitsiary kim ekenin túsindirý.
4) Halyq pen memlekettiń múddelerine tikelei qysym jasalǵan jaǵdaida, qalyptasqan kózqarastardy syni turǵydan qaita qaraý qajet.
