Foto: ShQO aqparat ortalyǵy
Shyǵys Qazaqstan oblysynyń ákimi Danial Ahmetov jergilikti BAQ-tyń qatysýymen ótken baspasóz máslihatynda Ridder jylý elektr ortalyǵynyń jańa ieleri týraly aitty, dep habarlaidy "Ult aqparat".
"Búgin óńirdiń buqaralyq aqparat quraldary ókilderiniń qatysýymen baspasóz konferentsiiasy ótti. Men oblystyń áleýmettik-ekonomikalyq damý qorytyndylarymen bólisip, birqatar mańyzdy jáne qyzyqty suraqtarǵa jaýap berdim. Atap aitqanda, Ridder jylý elektr ortalyǵy boiynsha birqatar saýaldar qoiyldy.
Ókinishke orai, Ortalyqtyń jańa ieleri jalaqy boiynsha 3,3 milliard qaryzdy óteý, jóndeý, jańartý jumystaryna qatysty eshteńe jasamady. Qazirgi tańda stantsiia bizdiń jeke basqarýymyzda jáne zańǵa sáikes jumys jalǵasýda, ony kommýnaldyq menshikke berý algoritmin júzege asyramyz", - dep jazdy óńir basshysy áleýmettik jelidegi paraqshasynda.
Aita keteiik, qańtarda Danial Ahmetov Ridderdegi jylý elektr ortalyǵynyń menshik iesi aýysqanyn málimdegen edi. Sol kezde ol ortalyqqa "qazaq investory" kelgenin naqtylaǵan bolatyn.
Jýyrda energetika ministrligi eldegi tozyǵy jetken jylý elektr ortalyqtarynyń reitingin jariialady. Oǵan sáikes, Ridder Jylý elektr ortalyǵynyń jabdyqtary 71,5%-ke tozǵan, ortalyqtyń ózi 1956 jyly paidalanýǵa berilgen.
Vedomstvo málimetinshe, Ridder JEO-da byltyr qazan aiynan beri apat jiilegen. Jylý jelileri jumysynyń temperatýralyq rejimi 133 ret saqtalmaǵany anyqtaldy. Al jetkizilgen kómir úshin "Qarajyra" AQ aldyndaǵy bereshek 1,5 mlrd teńgege jetken.
