Shyǵys Qazaqstan oblysynyń ákimi Danial Ahmetov óńirde eńbek migratsiiasyn retteý jáne oralmandardy qabyldaý jumystary salǵyrt júrip jatqanyn synǵa aldy, dep habarlaidy QazAqparat tilshisi.
Bul másele búgin oblys ákimdiginiń kezekti májilisinde talqylandy. «Ónimdi jumyspen qamtý-2020» baǵdarlamasynyń aiasynda Shyǵys Qazaqstanǵa biyl 714 otbasy kóship kelýi tiis. Atalmysh kvotanyń 364-i Túrkistan, Qyzylorda, Mańǵystaý, Almaty oblystarynan qonys aýdarýshylarǵa bólinse, qalǵan 350-i sheteldik qandastardyń otbasylaryna arnalǵan. Segiz aidyń ishinde atalmysh kvota 36,2 paiyzǵa ǵana oryndalǵan. Oblystyq jumyspen qamtý jáne áleýmettik baǵdarlamalardy retteý basqarmasynyń basshysy Elena Starenkova qonys aýdarýshylardy qabyldaýǵa jaýapty aýdandardyń sylbyrlyǵy kóshti tejep tur degen pikir bildirdi.
«Ásirese, Semei jáne Kýrchatov qalalary, Abai, Aiagóz, Zaisan, Kókpekti, Kúrshim, Tarbaǵatai, Úrjar aýdandary belgilengen kvotany igermei otyr» - dedi Elena Starenkova.
Danial Ahmetov basqarma basshysyna atalmysh máselege muqiiat bolýdy tapsyrdy.
«Áýeli Sizdiń ózińizge jumys tásilin ózgertý kerek. Bólingen kvotanyń naqty qandai aýyldyq okrýgke berilgenin bilmei otyrsyz. Jumysqa bulai salǵyrt qaraýǵa bolmaidy. Kóshi-qon degenińiz - memlekettik másele. Bizdiń Katonqaraǵai aýdanynda jyl saiyn halyq azaiyp barady. Al Sizder bólingen kvotanyń ózin igere almai otyrsyzdar. Aýyldy damytýǵa bólingen 3,5 mlrd teńgeniń nesiesin 30 paiyz ǵana igergensizder. Áiteýir igere almaidy ekensizder, sol aqshany kóship keletin otbasylarǵa baǵyttańyzdar. Onsyz da el aýyldan údere kóshýde. Al biz qol qýsyryp, qarap otyrmyz. Atalmysh kvota Glýbokoe, Shemonaiha, Zyrian aýdandary men Ridder qalasynda kóptep bólinýi tiis. Nemqurailylyqty qoiyp, osy baǵytta jumys isteńiz» - dedi aimaq basshysy.
Keri ketken kóshti durys arnaǵa burý úshin endi ár aýdandaǵy bos úilerdiń tizimi jasalyp, ony memleket menshigine satyp alý jáne jóndeý jumystary uiymdastyrylmaq. Sodan keiin ǵana ár aýdanǵa bos úilerdiń sanyna bailanysty kvota bólinetin bolady. Al kóship kelgen otbasylardy jumyspen qamtý úshin memlekettik jer qorynan egindik pen jaiylym telimderi bólinedi. Shaǵyn nesie arqyly mal satyp alýǵa da jol ashylmaq.
«Shetelden qandastardy shaqyrý jetkiliksiz. Shaqyrǵan ekenbiz, durys jaǵdai jasalýy tiis. Turatyn baspanasy, bala-shaǵasyn asyraityn kásibi, jaiylym men egindik jeri bolýy tiis. Al ózge óńirlerden keletin otbasylardy kóshirip alý úshin Tarbaǵatai aýdanynyń tájiribesin paidalanýǵa bolady. Kóship keletin januianyń árqaisymen jeke tansyp, jumys isteýge nieti bar adamdardy birinshi kezekte ákelý qajet» - dedi Danial Ahmetov.
