Ulttyq bank Tóraǵasynyń orynbasary Áliia Moldabekova naýryzdaǵy valiýta naryǵyndaǵy jaǵdai týraly aitty, dep habarlaidy QazAqparat.
«Naýryzda AQSh memlekettik baǵaly qaǵazdarynda kiris kóbeiip, AQSh dollarynyń jahandyq deńgeide nyǵaia túskeni – damýshy naryqtardyń oń qarqyn alýyna múmkindik bermei otyr. Jalǵasyp kele jatqan Covid-19 pandemiiasy jáne jekelegen elderde lokdaýndardy engizý, baiaý jáne birkelki júrgizilmegen vaktsinatsiia problemalary álemdik ekonomikanyń budan bylaiǵy ózgerý baǵytynda ózekti kúiinde qalyp otyr. Sonymen qatar, biz AQSh-taǵy kiristiń turaqty ósýi naryqtardaǵy mańyzdy draiverlerdiń birine ainalǵanyn baiqap otyrmyz», - deidi Ulttyq Bank Tóraǵasynyń orynbasary Áliia Moldabekova.
Onyń aitýynsha, naýryzdyń sońynda AQSh-tyń 10 jyldyq qazynashylyq obligatsiialarynyń kirisi 1,74% deńgeiine jetti, bul bir jyldyq kezeńge qaraǵanda óte joǵary mán. AQSh obligatsiialary kiristiliginiń artýy biliktiń keń aýqymdy fiskaldyq jáne monetarlyq qoldaý sharalaryna bailanysty infliatsiianyń jedeldeýi týraly investorlardyń alańdaýshylyǵyna bailanysty bolyp otyr.
«11 naýryzda AQSh prezidenti D.Baiden 1,9 trln AQSh dollaryn ekonomikany yntalandyrýǵa bólý týraly zańǵa qol qoidy jáne taldaýshylar AQSh ekonomikasynyń ósý boljamdaryn jaqsartýda. AQSh-tyń IJÓ ósý qarqyny boiynsha konsensýs-boljam 2021 jyly bir ai burynǵy 4,9%-ǵa qaraǵanda 5,7-5,8%-ǵa deiin ósti. Mundai jaǵdaida AQSh-tyń qor indeksteri eń joǵary mánderdi qaita jańartady, iaǵni Dow Jones indeksi bir aida 6,6%-ǵa, S&P 4,2%-ǵa ósti.
AQSh MBQ kiristiliginiń turaqty ósýi amerikandyq valiýtanyń odan ári nyǵaiýyna alyp keldi. DXY dollarynyń indeksi damyǵan elderdiń valiýtalaryna qarsy bir aida 2,6%-ǵa nyǵaidy», - deidi ol.
Sondai-aq, damýshy elderdiń valiýtalary úshin naryqtyq sentiment te teris boldy: Emerging markets valiýtasynyń indeksi 1,1%-ǵa álsiredi. EM elderiniń arasynda ortalyq bank basshysy jumystan bosatylǵannan keiin túrik lirasy (-)11,1%, Indoneziia rýpiiasy (-)2%, Resei rýbli (-)1,5% álsiredi.
«Infliatsiianyń jyldamdaýyna qatysty qaýiptený aiasynda damýshy elderdiń keibir ortalyq bankteri aqsha-kredit talaptaryn kúsheitýge kiristi. Braziliianyń Ortalyq banki mólsherlemeni 2,75%-ǵa deiin (+0,75 p.t.), Reseide 4,5%-ǵa deiin (+0,25 p.t.), Túrkiiada 19%-ǵa deiin (+2 p.t.) kóterdi», - deidi Áliia Moldabekova.
